Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 72r
Marwolaeth Mair
72r
arglỽyd a gỽpplaaỽd vynn damunet. i. Ac a|be+
ris ym ych gỽelet chỽithev am llygeit knaỽta+
ỽl kynn vy marỽ. A llyma vynnhev yn kerdet
y fford vy ryeni. A|mynhev ach gỽediaf chỽith+
ev oll am vy gỽylaỽ i hyt yr aỽr y|del yr arglỽyd.
Ac y del vy eneit o|m corff. ny phedrussaf ynhev
kannys yr arglỽyd ach duc chỽi yma yr didan+
nỽch ym yn erbyn y|gouudyev a|daỽ arnaf.
Ac vrth hynny mi a archaf y|duỽ yn|y byrr am+
ser yssyd ym o|r uuched gynndrychaỽl honn yny
vo y|gỽedill a dyckỽyf ygyt a|chỽi ygỽassanaeth
y|duỽ. A gỽedy kennhyadu ohonunt hynny bot
yn llaỽen yn|y didanu. Ac yno y|buant teir·nos
a|thridieu. ar|volyant y|duỽ. nachaf ar aỽr ech+
ỽyd yn|y trydydyd hỽnnỽ. dygyrchu hun ym
pob vn ohonunt o|r a|oed yn|y ty hyt na aallaỽd
vn ohonunt vot hep gyscu. namyn yr ebestyl.
Ar teir morynnyon y|gorchymynnassei hi vdunt
wassannaethu y|chorff. Ac ar hynny nachaf
yn deissyuyt Jessu yn dyỽot y|myỽn a|lluossogrỽ+
yd egylyonn ygyt ac ef. Ac yn dyỽedut vrth
yr ebestyl. tangneued yỽch vrodyr. Bit arnam
dy drugared arglỽyd hep ỽynt. megys y|gobe+
ithassam y|vot. Ac yna yd ymystynnaỽd meir
ar y llaỽr a|gỽediaỽ yr arglỽyd val hynn yman.
| « p 71v | p 72v » |