Rhydychen, Llsgr. Coleg yr Iesu 57 – tudalen 188
Llyfr Blegywryd
188
lỽrỽ. namyn enniỻ y|r dyn y|da dracheuyn. a
ỻyna anghyuarch adefedic ny dylyir dirỽy am+
danaỽ. A|oes un ỻe y dylyir dihenydyaỽ dyn am
ledrat a gỽarant idaỽ. Oes. O|r geilỽ dyn warant
o offeiryat. neu o greuydỽr araỻ. a hỽnnỽ yn|ba+
raỽt y gymryt y ỻedrat o|e laỽ. ny dylyir y rodi
idaỽ. ac ynteu ac urdeu duỽ arnaỽ. a ỻyna y ỻe y
dylyir dihenydyaỽ dyn a gỽarant idaỽ. A|oes
un ỻe y dylyo affeithỽr talu mỽy no ỻofrud. Oes;
O|r|deruyd y dyn. ỻad merch caeth. a bot affeithỽr
idi. mỽy a|dal yr affeithỽr yna no|r ỻofrud. A|oes
vn ỻe y|dylyo mab bot yn arglỽyd ar y|dat o gyf+
reith. Oes; O|r|deruyd y uchelỽr. rodi y verch y
aỻtut e|hun. a bot plant meibyon udunt. a gỽe+
dy hynny marỽ yr uchelỽr. a chaffel o veibyon
yr aỻtut mamwys o dir eu hendat. y rei hynny
a|vydant arglỽydi ar eu tat. A|oes un alanas
ny dylyo bot affeith idi. Oes. O|r deruyd y aniue+
il ỻad dyn. hỽnnỽ yỽ y ỻofrud. A|oes un aniue+
il a|dylyer bot vyth dan y deithi. oes; hỽch ryde+
ric.
| « p 187 | p 189 » |