Rhydychen, Llsgr. Coleg yr Iesu 57 – tudalen 33
Llyfr Blegywryd
33
a geif o aryant y gỽestuaeu. a|e verch a vyd vn
vreint a merch y bard teulu. chỽeugeint vyd
y ebediỽ. Y gỽastraỽt a geiff kyfrỽy peunydya+
ỽl y brenhin. a|e ystarn. a|e ffrỽyn. a|e hossaneu
ỻedyr. a|e ysparduneu. a|e gapan glaỽ pan
beito ac ỽynt. Y varch ef a|vyd rỽng march y
march* y* brenhin a|r paret. Medyd a geif traean
y kỽyr a dynner o|r gerỽyn. kanys y deu·parth
a rennir yn deir rann. y dwy y|r neuad. a|r dry+
ded y|r ystaueỻ. Y coc a geif crỽyn y deueit a|r
geiuyr. a|dichwynnyon y gaỻaỽr. ~ ~ ~
P Enkerd y wlat a dyly caffel gobreu
merchet y kerdoryon a|vont y·danaỽ.
ac a|dyly kaffel kyfarỽs neithyaỽr. o|bop
morỽyn pan wrhao. nyt amgen no phedeir
ar|hugeint o aryant. Ny henyỽ y penkerd o
rif sỽydogyon ỻys. Pan vynno y brenhin
wandaỽ* canueu. kanet y penkerd deu ga+
nu idaỽ yng|kynted y neuad. Pan vynno
y vrenhines gerd o|e|gỽarandaỽ yn|y hystaueỻ.
| « p 32 | p 34 » |