LlGC Llsgr. Llanstephan 27 (Llyfr Coch Talgarth) – tudalen 38v

hynny. Ac yna drỽy y wediaỽ ef galỽ yn garedic ar yr yspryt

glan. gan|dywedut yr emyn hỽnn o|r yspryt glan. gan garoli

neu|hopyaỽ dy gaỻon idaỽ o|e hoỻ ewyỻys serchaỽl garyat.

D Yret yspryt. sant creaỽdyr byt bydoed eurnaf. Y|n caỻon+

neu a|n|dỽy·vronneu. vreinyaỽl hynaf. Gofỽy yn bryt.

tro yn kyngyt. keingadyr waessaf. ỻawna o|th rat. ni a|th garyat.

gỽraỽl adaf. Ti yỽ|n kadyrdỽr a|n|didanỽr y didanaf. ffynnon vyỽ+

rat. rod douyd dat. o dut uchaf. Tan annỽylyt. serch a|gleindyt

glan demyl euraf. Oes duỽ r deheu doethyon eiryeu. eirian wa+

naf. Seith·dyblyc rod. o seith·ryỽ vod vud nefolaf. a ryd yn haỽd.

ynn ymadraỽd meidraỽl araf. Ennyn geli. yn|oleuni. loewne

heul haf. Serchaỽl dirryeu. y|n|synnhỽyreu. serch synhỽyraf.

ffyrua weindyt. y|n knaỽt dybryt. kny* dybryttaf. Kadarnhaa

ni rac traha. trỽy|r nerth hyttraf. Peỻ yr elyn y|ỽrth bob dyn. dyn+

yaỽl anaf. Dyro hedỽch. ynn drỽy elỽch. o dro alaf. val y gaỻom.

ochel pob som. somit waethaf. Pob argywed a|phop dryged. dre+

ic arwraf. Dyro wybot. y tat drỽydot. dro dwyỽolaf. a|r mab

gỽynvyt. ti|r glan yspryt. ysprydolaf. Molyant maỽred y|r tat

ryssed. rỽysc aduỽynaf. Maỽl dilesteir. y vn mab meir. morỽyn

deckaf. ac anuonet mab arglỽyd cret. creaỽdyr pennaf. ynn

annwyldan. yr yspryt glan glein annỽylaf. Amen. ~

Ac odynna ymdyro y ymgaru a|r mab gỽynuydic o|th hoỻ nertho+

ed yn vn wed a phei|bydei ef yn gorfforaỽl y·rỽng dy vreicheu.

yny glywych o nerth y serchaỽl garyat hỽnnỽ ryỽ ber uerỽi+

neb yn|y gieu a|r gỽythi. ac ar hyt yr hoỻ gnaỽt. ac yn|y mynỽgyl

megys golusgyon o dileeu mel kynteit. ac yn|y gaỻon megys

digrifserch waryeu yn peri idi megys per·garoli neu berhop+

yaỽ.