LlGC Llsgr. Llanstephan 4 – tudalen 3v
Claddedigaeth Arthur
3v
hafren yssyd yn|y gylch. kyt bei prio+
dolach y galỽ keffinyd auonyd o ach+
aỽs y bot yg|kymherued auonyd. ac
yn iaỽnach galỽ ynyssed tir ym|perued
y weilgi. Pa achaỽs y gelwir ynteu a+
vaỻach. namyn o|e vot yn ỻe amyl
auaỻgyrn. neu ynteu o vot yn arglỽ+
yd ar y ỻe hỽnnỽ gỽr gynt a|elwit a
elwit auaỻach. Ef a notteit heuyt
galỽ y ỻe hỽnnỽ ynys wydrin o achaỽs
auon a|oed yn|y damgylchynu a ỻiỽ
glas gỽydraỽl ar y dỽfyr. ac ỽrth hyn+
ny y gelwis y saesson hi gỽedy y go+
resgyn glastynbri. kanys glas yn sa+
esnec yỽ gỽydyr yg|kymraec. Honneit
yỽ weithon paham y gelwir y ỻe hỽnnỽ
ynys wydrin. paham auaỻach. a
phaham glastynbri a honneit yỽ heuyt
pa|dylyet a|oed chỽedylydyon galỽ y
wreic honno Margan yn dỽywes o annỽ+
fyn a bit honneit hynn heuyt kyt
kaffo y dywededic abat uchot gyuarỽ+
ydyt y ỽrth gorf arthur. o hen lyfreu ac
ystoryaeu. a|pheth heuyt o|r ỻythyr a
oed gỽedy eu hysgriuennu yn|y crỽys
a gỽedy eu ry|dileu haeach o hen ynys
| « p 3r | p 4r » |