LlGC Llsgr. 3035 (Mostyn 116) – tudalen 109r
Brut y Brenhinoedd
109r
ethant escyb y druan wlat hono y·gyt a| e hyscolheigon
o| r a oed darystygedic vdunt ygyt ac escyrn y seint ac
eu creireu Ac yn troetnoethon y doethant hyt rac bron
arthur Ac erchi drugared dros atlibin y| bobyl honno
Ac ar eu glinyeu y wediaỽ hyt pan trugarhaei ỽrthunt
kanys digaỽn o berigyl a| drỽc ry| wnaoed* vdunt kanyt
oed reit idaỽ dilit hyt ar dim yr hyn a| di·aghassei onadunt
A| gỽedy erchi o·nadunt trugared ar y| wed hono. vylaỽ o| war+
der a oruc arthur a| rodi y| r gỽyrda seint hyny eu harch.
A gỽedy hedychu a| r yscotteit y brenhin a aeth hyt yg| kaer
efraỽc y anrydedu gỽylua y nadolyc a oed yn agos
A| phan welas ef yr eglỽysseu wedy eu distryỽ hyt y
ỻaỽr doluryaỽ yn vaỽr. kanys gỽedy dehol samsỽn arch+
escob a| r gỽyrda maỽr enrydedus ereiỻ y·gyt ac ef ỻosci
yr eglỽysseu a| r temleu a| wnathoed y| saesson a| distryỽ gỽas+
sanaeth duỽ ym pop ỻe kanys pan deuthant yr anreithwyr
hẏnẏ Y| foes samsỽn archescob a| seith escyb y·gyt ac eff hyt
yn ỻydaỽ Ac yno yn enrydedus yd erbynỽyt hyt y dyd diweth+
af o| e vuched Ac yno gỽedy galỽ paỽb ygyt o| r yscolheigon
ac o| r bobyl o gytgygor paỽb| yghyt ef a| ossodes priaf y| gap+
lan e| hunan yn archescob yg| kaer effraỽc A| r eglỽysseu di+
wreidedic hyt y| ỻaỽr ef a| e hatnewydỽys Ac a| e hardunaỽd
o grefydusson genueinoed o wyr a gỽraged A| r gỽyrda
bonhedic dylyedaỽc a| r deholassei y| saesson Ac a| ducsynt
tref eu tat. ef a| rodes y baỽb eu dylyet ac eu hanrydet
Ac ym|plith y| rei hyny yd oedynt tri broder a| hanoedynt
o vrenhinyaỽl dylyet. Nyt amgen ỻeu vab kynuarch
Ac vryen vab kynuarch ac araỽn vab kynuarch. A| chyn
dyfot gormes y| saesson y| rei hyny a dylyynt tywyssogaeth
y gỽledi hyny Ac y| r gỽyr hyny megys y baỽb o| r dylyedo+
| « p 108v | p 109v » |