LlGC Llsgr. 3035 (Mostyn 116) – tudalen 45r
Brut y Brenhinoedd
45r
chymeỻ eu gelẏnyon drachefẏn A gỽedy ỻad milioed
o|pop parth y damweinỽẏs y|r brytanyeit caffel y vudu+
golyaeth a ỻad gabius a|phorcena. A|r hen sỽỻt cudy+
edic oed yn|y gaer hỽnnỽ a|ran·ỽyt y ketymdeithon. Ac
yno y|trigyỽys bran yn amheraỽdyr yn rufein y gỽneu+
thur yr arglỽydiaeth ny chlyỽẏt kẏn no hẏnnẏ y|chreu+
londer A|phỽy bynac a vynho gỽybot gỽeithredoed bran
wedy hyn edrychet ystorẏaeu gỽyr rufein. kany pherthyn
ar yn defnyd ni. ~ ~ ~ ~ ~ ~ ~ ~ ~ ~ ~ ~
A c yna y kychwynỽẏs beli ac y doeth y ynys brydein
Ac yn hedỽch tagnefedus y treulỽys y dryỻ araỻ
o|e oes Ac odyna y dechrewis kadarnhau y keryed*
a|r dinassoedd a|r kestyỻ yn|y ỻe y bẏdẏnt yn ỻesgu. Ac a+
deilat ereiỻ o|newyd Ac yna yd adeilỽys kaer a dinas
ar auon ỽysc yr hỽn a elwit drỽy ỻawer o amser kaer
ỽysc. Ac yno y bu y trydyd archescobty ynys brydein
gỽedy hyny. A gỽedy dyuot gỽyr rufein y|r ynys
hon. y gelwit kaer ỻion ar ỽysc. A|beli a|wnaeth porth
yn ỻundein an·ryued y veint a|e weith. Ac o|e enỽ y
gelwir etwa porth beli. Ac ydanaỽ y|mae disgynua
y ỻogeu. Ac yn|ys oes ef y|bu amylder o|eur ac aryant
megys na bu yn gynhebic yn yr oessoed gỽedy ef
A|phan doeth y diwed a|e varỽ y ỻosget y|eskyrn yn ỻu+
dỽy ac y|dodet y|myỽn ỻestyr eur ym|pen tỽr a wnath+
oed e|hun yn ỻundein ~ ~ ~ ~
A gỽedy marỽ beli y doeth gỽrgan varysdỽrch* y
vab ynteu yn vrenhin gỽr vu hỽnnỽ a|whedych+
ỽys gỽeithredoeth y|tat drỽy tagneued a iaỽn+
der a|chynal y|deyrnas rac estraỽn genedyl yn prud
adan gymeỻ y elynyon yn dylyedus darestygedigaeth
| « p 44v | p 45v » |