LlGC Llsgr. 3036 (Mostyn 117) – tudalen 174
Brut y Brenhinoedd
174
a chyscu hyt pan uei uỽy yd argywedei y|guenỽyn
idaỽ. Ac ufydhau a|wnaeth y|brenhin ỽrth gyghor
y bradỽr a chyscu megys kyt bei kymryt iechyt
a|wnelhei o|r diaỽt. Ac eissoes heb vn gohir redec
a|wnaeth y|guenỽyn ar hyt y gỽythi. Ac ym pop
lle ar hyt y gorff. Ac yn ol hynny nachaf yr agheu
yn dyuot. yr hon nyt arbet y neb. Ac yn guahanu
yr eneit ar corff. Ac ym plith hynny eissoes llith+
raỽ a|wnaeth yr yscymun vradỽr hỽnnỽ rỽg vn
ac arall. Ac ny welet o hynny allan yn|y llys.
AC yna tra yttoedet yn guneuthur y petheu
hynny yg kaer wynt. yd ymdangosses se+
ren enryued y meint a|e heglurder ac vn pala+
dyr idi. Ac ar pen y paladyr pellen o tan ar lun
dreic. Ac o eneu y dreic deu paladyr yn kerdet.
Ar lleill o·nadunt a|welit yn ymestynnu dros
eithauoed freinc. Ar llall parth a|mor iwerdon.
Ac yn rannu yn seith paladyr bychein ereill.
A phan ymdangosses y seren honno. ofyn maỽr
a|gymyrth paỽb o|r llu yndunt rac enryuedet
gantadunt y weledigaeth. A sef a oruc vthyr
pendragon eissoes pan welas y seren honno gan
diruaỽr ofyn galỽ attaỽ y doethon. A gouyn ud+
unt peth a arỽydoccaei y seren honno. Ac ym
plith paỽb o hynny yd erchis keissaỽ myrdin.
kanys yno yr dothoed ỽrth wne+
uthur trỽy y gyghor pop peth o|r
| « p 173 | p 175 » |