LlGC Llsgr. Peniarth 11 – tudalen 154v

heb yr offeiryat a gyffelybir y iachwyaỽdyr y byt. Ac ny dywe+

daf|i ytti mỽy. kanys nyt oes ymi rydit y dinoethi dirgeledigaetheu

duỽ. Arglỽyd heb·y gỽalchmei mi a|o·vynnaf ytt am vrenhin yr

hỽnn a gymerth mab marỽ idaỽ. ac a beris berwi y mab a|e roi

y vrenhinyaeth o|e vwyta. Je heb yr offeiryat neur daroed yna

trossi y vedỽl ef a|e ewyỻys parth ac att duỽ. Ac am hynny y

gỽnaeth ef aberth y duỽ o|e vab ac o|e|waet. ac am hynny y ro+

es y vab o|e vwytta y baỽp o|e wlat. Ac oblegyt mynnu bot paỽb

yn vn vedỽl ac ynteu y goruc ef ueỻy. Bendigedic vo yr aỽr y

doethum yma heb·y gỽalchmei. yno y trigyaỽd ef y nos honno

a hoff vu ganthaỽ y letty. A|thrannoeth gỽedy offeren ef a

gychwynnaỽd ymeith o|r casteỻ. ac a doeth y|r gỽeirglodyeu tec+

kaf o|r a|welsei eiryoet. ac a|varchocaaỽd yny doeth diwarnaỽt yn

agos y lys brenhin peleur. ac ef a damchweinyaỽd ar ty meu  ̷+

dỽy yr hỽnn ny aỻei neb vynet idaỽ y myỽn. a|e gapel nyt oed

vỽy haeach. a|r gỽr da a|oed yno ny buassei odieithyr y ty yr

ys deugein mlyned. Y meudỽy a estynnaỽd y benn trỽy ffenes+

tyr pan weles gỽalchmei. ac a|dywaỽt. grassaỽ duỽ ỽrthyt vn+

benn. Ac y titheu antur da heb·y gỽalchmei. ac a eỻy di vy ỻet+

tyaỽ i heno. Arglỽyd heb y meudỽy ny lettyir neb yma onyt duỽ.

yr|hynny ti a gey letty da yma yn agos. yn|y ỻe y ỻettyir marcho+

gyon vrdolyon da. Arglỽyd heb·y gỽalchmei pỽy bieu y ỻe hỽn+

nỽ. Y|mae yn eidaỽ brenhin peleur heb y meudỽy. a|dỽfyr ma+

ỽr yn|y gylch ogylch. ac yn amyl o bop da. ac ny dyly ỻettyaỽ y+

no neb ony|byd yn ỽr da. Duỽ a|wnel ymi vot veỻy heb·y gỽ+

alchmei. Pan wybu walchmei y|vot yn agos y|r casteỻ