LlGC Llsgr. Peniarth 11 – tudalen 21r
Ystoriau Saint Greal
21r
fford da. Yr drycket vo heb·y galaath my·vi a af tu ac yno.
y ba ryỽ beth heb y gỽas. Y geissyaỽ diua yr aruer|drwc yssyd
yno heb y galaath. Myn vyng|kret heb y gỽas mi a|debygaf
y byd ry galet ytt yr aruer hỽnnỽ. ac aro di vy·vi yma. ~
Ac yna y gỽas a|aeth y|r casteỻ. ac ny bu hir y trigyaỽd gala+
ath yny weles yn dyuot attaỽ seith marchaỽc urdaỽl yn arua+
ỽc aỻan. y rei a|dywedassant ac a|archassant y galaath ym+
ogelut racdunt. Paham heb y galaath a|e ygyt ar vntu yr
ymledỽch chỽi a myui. Je heb y marchogyon. kanys uelly ̷
yỽ yr|aruer yma. A|phan|gigleu ef hynny ef a oỻyngaỽd y
varch tu ac attunt. ac a|drewis y kyntaf a|gyfaruu ac ef yny
vyd y|r ỻaỽr ac yn agos idaỽ a|thorri y vynỽgyl. ac ỽynteu a|e
traỽssant ynteu yna. Eissyoes ny chỽympaỽd nac o|e gyf+
rỽy nac y ar y uarch yr hynny. ac ar yr ymgyhỽrd hỽnnỽ y|tor+
rassant eu peleidyr oỻ. a|chynn|torri paladyr galaath. ef a
vỽryaỽd tri o|r marchogyon y|r ỻaỽr. Ac yna ef a|dynnaỽd y
gledyf. ac ỽynteu a|dynnassant eu|cledyfeu. ac ueỻy ymguraỽ
a|orugant yn|ffest. Ac yr hynny kystal y diodefaỽd galaath ar+
naỽ yr ymlad. ac y bu reit udunt ỽy oỻ adaỽ y maes a chilyaỽ.
a|ryuedu yn vaỽr a|orugant bot myỽn vn dyn bydaỽl o|r byt
hanner hynny o nerth. Ac ueỻy y parhaaỽd yr ymlad y·ryg+
thunt yny vu hanner dyd. a|r seith marchaỽc yna a|oedynt
gyn|vlinet ac na ellynt amdiffyn eu heneidyeu o·blegyt ym+
lad. Ac yna ỽynt a|dechreuassant ffo. a galaath nyt ymlitya+
ỽd yr vn o·nadunt. namyn ymchoelut parth a|phorth y cas+
teỻ. Ac yno ef a|gyfaruu ac ef gỽr prud a|diỻat crevydus ym+
danaỽ.
| « p 20v | p 21v » |