LlGC Llsgr. Peniarth 46 – tudalen 161
Brut y Brenhinoedd
161
y rodes gỽyr ruuein cadarnnyon disge+
digaetheu y|r ergrynedic bopyl honno.
ac erchi udunt adeilat kestyll. a|thy+
reu ar lann y|mor yn|y porthueyd y|bei
disgynuaeu llogeu yndunt ỽrth gadỽ
y|gỽlat rac y|gelynnyon. ac eissoes
haỽs yỽ gỽneuthur hebaỽc o|r barcutan
no gỽneuthur bilein yn dysgedic ar
uyrder. a|phỽy|bynnac a|rodho dysc o
anodun doethineb idaỽ. kynnhebic yỽ
y|r neb a|ỽasgearei gemeu gỽerthuaỽr y
dan traet moch. ac yna kychỽyn a|or+
uc gỽyr ruuein ymdeith megys na del+
hynt byth y|r ynys honn dracheuen.
ac gỽedy mynet gỽyr ruuein racdu.
nachaf Gỽinỽas. a|melỽas a|llyges ua+
ỽr gantunt yn dineu o|r llogeu y|r|tir.
ar llaỽer o|r gỽydyl. ac yscotteit. a|gỽyr
yr ynyssoed gantunt. a|phob kenedyl
o|r a|ellyssynt y|cael ygyt ac ỽynt. ac
o|r lle goresgyn yr alban o|uyỽn y|r mur.
| « p 160 | p 162 » |