LlGC Llsgr. Peniarth 9 – tudalen 25v
Ystoria Carolo Magno: Can Rolant
25v
heb yn ỽraỽl yn erbyn ffreinc kanys bychan
eu niuer. ac na allant gỽrthỽynebu y ninheu
bychydic a dal charlym o rym vdunt hed+
iỽ ot ymledỽch yn da y maynt oll yn varỽ
yn yn llaỽ. Pan gigleu tỽrpin archescob
hyny llidyaỽ a llywyaỽ y varch y tu ac attaỽ
a chyrchu yr anffydlonyon. a brathu corsa+
brin drỽy y taryan ar lluryc ac escyrn y vron
a|thrỽydaỽ berued yny uu yr llaỽr gan dirua+
ỽr bỽys a phan welas ef o|y orwed yn merwi
yn an·ffurueid ymadraỽd a oruc ac ef val hyn.
yn ychwerỽ. Geuaỽc vuost anffydlaỽn lla+
wer a grymya charlymayn y ni yn gyndrych+
aỽl ac a dalỽys hyt hyn. ac a dal o hyn allan.
dỽysseỽch yna ac ỽynt heb ef. kyweresegỽch
hỽynt lledỽch rei marwaỽl. A gedymdeithy+
on da y may y kyflauaneu kyntaf yn ad+
aỽ ynny vudygolyayth. nyt oys na nerth
na grym na dayoni yn|y lluossogrỽyd rac+
co. Ac odyna dodi gaỽr arnadunt hyt y
ben o vynyd llewenyd. Ac o|y aỽr ynteu gyr+
ru grym a gleỽder yn holl lu ffreinc. Ac
yn hyny gereint a gerard deu gedymdeith.
gỽeisson deỽr o ffreinc a gyrchyssant y pag+
anyeit o gyuundeb a dỽy leif. A gereint
a urathỽys malkabrin. Ar gerrart a vrath+
ỽys lannaliff. ny bu o lud a allei eu diffryt
yny vu y gleifeu drỽy y holl arueu a|thrỽyd+
unt y hunein ac y ar y meirch yr llaỽr. Ac
| « p 25r | p 26r » |