LlGC Llsgr. 3035 (Mostyn 116) – tudalen 85r
Brut y Brenhinoedd
85r
yr hỽn am eu pechodeu anudon a diua y kiỽdaỽtwyr
Gỽynder y|gỽlan a argyweda. Ac amryfael liỽ y|rei hyny
Gỽae hi y|genedyl anudonyl. kanys kaer arderchaỽc
a|dygỽyd o|e hachaỽs. ỻawenhau a wnant y ỻogeu o|r
ueint achwanec hon. Ac vn o deu a vẏd. Draenaỽc
gỽrthrỽn* o aualeu a adeila hono drachefyn ỽrth arogleu
y rei hẏnẏ yd ehedant adar amryfalyon lỽyneu. ỻys
vaỽr a a·deila. Ac o|wech cantỽr y|kedernheir. ỽrth hẏnẏ
y|kyghoruynha ỻundein A|e muroed a|achwanecka yn
dri·dyblyc. Temys a gylchyna o|pop parth. A|chỽedyl
y gỽeith hỽnnỽ a gerda dros vynheu. Yndi y cud y
draenaỽc y aualeu A|fyrd dan y dayar a wna. Yn
yr amser hỽnỽ y dywedant y|mein. Ar y|mor yd hỽy+
lir y|freinc drostaỽ A gyfygir ym byrr yspeit. Ac y
am y|dỽylan yd ymglywant y dynyon A|chedernyt
yr ynys a|hỽylir Ena y damỻywychant dirgele+
digaetheu y|moroed A|freinc rac ofyn a|ergryna
Odyna y kertha ederyn o|lỽyn y kaladyr yr hon
a gylchyna yr ynys dỽy vlyned. O|nossaỽl lefein
y geilỽ yr adar A phob kenedyl adar a gytymdeith+
okaant idi En diwhyỻ y rei marwaỽl y ruthrant
A|hoỻ raỽn yr yt a lynckant Odyna y daỽ newyn y|r
bobyl. Ac yn ol y newyn girat agheu. Pan orffoỽys+
so y veint trueni hono y|kyrch yr yscymun edyn
hỽnnỽ glyn galabes. Odyna yd ymdrycheif y|my+
nyd goruchel ym pen hỽnnỽ y planha dar Ac yn|y
cheingeu y|gỽna y|nyth. Tri ỽy a dydỽ yn|y nyth
o|r rei y byd ỻỽynaỽc. a bleid ac arth. Y|ỻỽynaỽc
a lỽnc y vam. a|phen assen a vyd arnaỽ. Ac yny
bo kymeredic aghygyl yd aruthra y vrodyr
| « p 84v | p 85v » |