LlGC Llsgr. Peniarth 15 – tudalen 43

briawt y|vn mab dvw dat Sef yw honno yr eglwẏs vvdvgawl gynnv  ̷+

lledic o|gyffrẏdin lvossyd ffydlonẏon krist o|dynyon yr eglwys rẏvelvs

yma ac engylẏon yr eglwys vvdvgawl vrẏ bellach o|dan yr annwylserch

garyat ysẏd yn kyniret yrwg ẏ|tat a|r mab yr hwn y keffẏlẏbir yr

ysprẏt glan idaw Ac yn|wir ef yw y|dygwyd gwrechẏon yr eglwẏs

vvdvgawl ac odyno yg|kalonnev ffydlonnẏon. yr. eglwẏs ryvelvs yma ac

yr bẏchanet vo y|gwrthẏon hẏnnẏ nẏ allant vot yn llei namẏn ẏn voe

no|r holl vedyssawt kanẏs kyt ẏs galwer yn wrchyon nyt ynt lei no|r

kwbyldan yr hanwẏnt o·honnaw Sef yw hwnnw ẏr ysprẏt glan ac nẏt

llei hwnnw e|hvn. noc vnolder y|teir person ẏgẏt Yr annwẏlserch garyat

hwnnw a|wahenir yn dwẏ geing vn yw karv dvw yn voe no phob ryw

beth a|charv|dẏ|gẏfnessaf. ynn gẏmein a|thi. dẏ ehevn*. Yr eil yw karv dvw

yn vwẏ no phob rwẏ beth a|dylyir o|bedeir fford nyt amgen o holl gallon

o|holl eneit o|holl nerth o holl vedwl Sef yw hẏnnẏ yn doeth hyt na

bo neb rwẏ beth ẏn|ẏ gallon a|wrthwẏnepo y|garyat ef namẏn rodi

idaw yr holl gallon. kanẏs ef e|hvn. yssẏd yn|y herchi pan dẏweit vy mab

moes ym dẏ gallon. Sef ẏw hẏnnẏ holl ewyllẏs y|gallon hyt na bo

gwaet ẏn|ẏ gallon ar nẏ|s gellẏger o|e garẏat ef o|byd reit o|holl eneit  ̷

Sef yw hynnẏ ẏn bervelẏs. nev ẏn. velẏster hẏt na bo digrifvwch na phe+

rvelẏster yn|yr eneit namyn. dvw. e|hvn. Ac na|charer neb o|gyfyawn gary+

at namẏn ef nev a|dẏlẏer y|garv yr garẏat ef O|holl nerth Sef yw hẏnnẏ

ẏn gadarn hẏt na bo neb·rwẏ beth a|allo dẏ wahanv wrth garyat dvw

o|holl vedwl Sef yw hẏnnẏ yn gofawdyr hẏt nat el dros gof gennyt beth*

y|garyat ef namẏn kynnnal* ẏn dẏ|gof na|cherẏth* neb·rwẏ beth yn voe noc

ef karv dẏ|gẏfnessaf a|dylẏẏ yn gymeint a|thi dy|hvn Sef yw hẏnnẏ na|ry+

bvchych idaw drwc ac na|s mẏnnẏch mwẏ noc yt dẏ|hvn Ac a|vynnvt. y.

rybvchẏaw ẏt dy|hvn y vynnv idaw ẏntev. Ac na ettych arnaw ormod

gwall nac eissev moe nac arnat dy|hvn hẏt y|gellych yn gyfẏawn ẏ amdiff  ̷+

ynn megys nat ẏmlẏcrẏch dy|hvn ẏn ormod o|e garv ef yn|vwẏ no|thi

dy|hvn hyt na ettych dim ar dẏ helw y|achvb dy aghen dy|hvn heb y|rodi wrth

y|aghen ef kanys ny dylẏẏ di|garv neb yn vwẏ no|thi dẏ|hvn namyn dvw

kẏt ys|kerych Yn gymeint a|thi dy hvn Dy|gẏfnessaf yw pob vn o|ffydlonẏ+

on crist. Sef yw hwnnw pob cristyawn ffydlawn ac ynn|bennaf pawb

o|r a|wnaeth da ytt kyyt bych mwẏ rwẏmedic ẏ|th ryeni a|th gerint*

noc y|estronnẏon Ac yn voe y|th rwẏmir y|garv dy ryeni a|th gereint

ysprydolyon. megẏs eglwysswẏr a|chrevydwyr no|th rẏeni a|th gereint

knawdolẏon megẏs y|mae pennach yr ẏspryt no|r knawt ac yn bennaf

o hynnẏ od|weẏt* grevẏdwr dẏ gytgrevydwyr A|th|dadev ysprẏdolẏon. ~