LlGC Llsgr. 24049 (Boston 5) – tudalen 78
Llyfr Blegywryd
78
gỽẏbot ẏg|kẏureith tẏston. kẏnnẏ rẏ
tẏster vdunt. Ac nẏ|s bieu tẏston. Trẏ+
dẏd ẏỽ; gwẏbẏdẏeit bieu dỽẏn tẏstol+
ẏaeth ẏn erbẏn gỽat ac amdiffẏnn.
Sef ẏỽ hẏnnẏ gwẏbẏdẏeit bieu pro+
ui gỽir gwedi geu. Ac nẏ|s pieu tẏston.
Teir fford ẏ|mae kadarnach gwẏbẏd+
ẏeit no|sthẏston; vn ẏỽ. gallu dỽẏn lli+
aws o wẏbẏdẏeit am vn peth ẏg|kẏfreith.
neu vn gwẏbẏdẏat megẏs mach. Ac
nẏ ellir dỽẏn na mỽẏ na llei no deu tẏston.
Eil ẏỽ; gallu dirỽẏaỽ dẏn neu ẏ werthv
trỽẏ wẏbẏdẏeit. Ac nẏ ellir trỽẏ tẏst+
on o|gẏureith. Trẏdẏd ẏỽ; gallu ohon+
unt proui ẏn erbẏn gỽat ac amdiffẏn.
ac nẏ|s dichaỽn tẏston. Pan tẏsto tẏst
ẏnn|ẏ tẏstolẏaeth peth kẏureithaỽl ẏ
ereill ẏn erbẏn amdiffẏnnỽr. neu am+
diffẏnnỽr pan tẏst ẏnteu peth ẏn gẏure+
ith ẏn erbẏn tẏston; ẏ rei hẏnnẏ a elwir
gwrthtẏston ẏg|kẏureith. Ac ny ellir
eu llẏssu. Teir tẏstolẏaeth yssyd ar
eir. ac nẏ dẏgir ẏ|r creir; tẏstolyaeth lle+
idẏr ar ẏ gẏtleidẏr ỽrth ẏ groc a thyst+
olẏaeth nẏt elher ẏnn|ẏ herbyn pan dy+
ccer ar eir. A thẏstolẏaeth gwrthyston*.
| « p 77 | p 79 » |