Llsgr. Caerdydd 1.362 (Hafod 1) – tudalen 39r
Brut y Brenhinoedd
39r
fael hedỽch a rufeinaỽl amherodraeth y emdiffyn.
A llyma hediỽ arglỽyd gỽedy ry|anuon o duỽ y
gỽas ieuanc hỽn yma ytti yr hỽn a henyỽ o ru+
feinaỽl amherodron a brenhinholyon vrytanyeit
Ac y hỽnnỽ y kyghorỽn ni ytti rodi dy verch
a|th gyuoeth genthi. Ac y gyt a hynny edrych
ti vot yn kystal y dylyet ef ar teu ditheu ar y+
nys prydein. Kans kar agos yỽ ef y gustenin
a nei y koel yn brenhin ninheu. Ac ỽrth hynny
ny dylyit gỽarauun yr gỽr hỽnnỽ y verch ar
vrenhinyaeth. Ac ufydhau a|wnaeth eutaf yr
kyghor hỽnnỽ a rodi elen y verch a|e gyuoeth gỽ+
edy ef y vaxen. A gỽedy gỽedy* gỽelet o gynan hyn+
ny llidyaỽ a oruc. a mynet parth ar alban. A chyn+
nullaỽ llu maỽr y ryfelu ar vaxen.
A Dyuot a|e lu trỽy humyr a dechreu anreith+
aỽ y gỽladoed. A gỽedy menegi hynny hynny*
y vaxen kynullaỽ llu mỽyaf a allỽys a wnaeth
a mynet yn|y erbyn y roi kat ar vaes y gynan
a|e yrru ar ffo. Ac ny pheidỽys kynan namyn
kynullaỽ y lu ac anreithaỽ y gỽladoed. Gỽeith+
eu gan vudugolyaeth gỽeitheu. hebdi yd ymcho+
elei vaxen y ỽrthaỽ. Ac o|r diwed gỽedy gỽneuthur
kollet maỽr o pop vn yỽ gilyd. dyuot a|wnaeth
ketymdeith y·rydunt ac eu kymodi. a|e dỽyn yn
vn garyat.
AC ym pen yspeit pump mlyned syberwau
a wnaeth maxen o amylder eur ac aryant
a marchogyon. Ac yn|y lle parattoi llyghes. A
| « p 38v | p 39v » |