Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 83v
Ymborth yr Enaid
83v
Y Mab. mab melynnỽynn adueindỽf oed val
yn oet deudeg|mlỽyd. Ac yn gymedraỽl y
dỽf a|dyat y|gorff. o|hyt a|phraffter vrth y|oet.
penn gogygrỽnn gỽedeid idaỽ. a gỽallt penn+
grychlathyr pefyrloyỽ eureit velynnlliỽ arnaỽ
yn vnffuryf a|phei gellit llunyaỽ nev vedylyaỽ
dỽy yscubell o|van adaued nev van gasnad o
eur trinaỽtaỽd a hynny megys ar voe no ry+
chỽant o|bop tu yr deu wyneb glaerwynnyon.
a|thoryat pedaỽlfuryf ar|y gỽallt ar|y|dal. ac
yn gyfuch ac y|gỽelit llaỽer o|r klusteu. torryat
y|gỽallt ar ystlysseu y|penn ac ar y gỽegil yn
arỽein ar|dyrchafat kroket wedeidlỽys. ar
gỽallt oll yn benngrychlathyr hyt ar yr yat. ac
yno yn|bennllyfynlỽys gribedicloyỽ vrth gynnỽ+
yssaỽ yr eur goron arnaỽ. A gỽynndal gỽastat+
lyfyn ehanglathyr mereridliỽ idaỽ. a|dyrnued
amyl yr gỽr mỽyhaf yn|y let. a|rychỽant eha+
laeth yn|y hyt o|r eneidrỽyd y|gilyd. Ac ydan hyn+
ny dỽy burloyỽduon hirueinon aeleu megys
dỽyueing o|r muchud gloyỽduaf a|vei y|myỽn dir+
uaỽr greic o|r krissyalt neu o|r mererit llathyr+
wynnaf o|r a|allei vot. neu gynnhebic y|dỽy vein
bleth o|vein sidan gloyỽdu ar|dỽy laỽes o|r ysgar+
lat klaerỽynnaf a|vei. Ac yrỽg y|dỽyael a|r|llỽy+
| « p 83r | p 84r » |