LlGC Llsgr. Llanstephan 27 (Llyfr Coch Talgarth) – tudalen 111v

cesar o|r goỻyngy hỽnn. kann dywaỽt y vot yn uab y duỽ ac

yn vrenhin. o·nyt ef a uynny y uot yn vrenhin. ac na bo cesar.

Ac yna y dywaỽt pilatus ỽrthunt yn gyflaỽn o gyndared.

Bredychvs eiryoet vu aỽch kenedyl chỽi. a gỽrthỽyneb uva+

ỽch y|r neb a|uei drossaỽch. Pỽy yssyd drossom ni heb yr Jdew+

on. Aỽch duỽ heb·y pilatus yr hỽnn a|ch edewis. ac a|ch duc ~

gynt o geithiwet kalet genedyl yr eifft trỽy y mor rvd mal

trỽy y tir sych. a|ch porthes yn|y diffeith o vỽyt nefaỽl. nyt am+

gen manna. ac a duc yỽch dỽfyr o|r garrec y dorri aỽch sychet.

ac a rodes aỽch dedyf yỽch yna. ac ym·pob|peth o|hynny y keis+

assaỽch gỽrthỽynebu y|uch duỽ. ac y dineuassaỽch dinawet.

ac y dyrchafyssaỽch hỽnnỽ yn|duỽ yỽch. ac y mynnassei duỽ

aỽch ỻad yna. ac y gỽediaỽd moẏsen drossaỽch na|ch ỻadei. ac yr

aỽr·honn y dywedassaỽch bot yn gas gennyf|inneu cesar. Ac ar

hynny kyuodi pilatus y vynnu adaỽ y vraỽtle. Ac yna ỻefein

arnaỽ o|r idewon a|dywedut. Ni a wdam heb ỽynt panyỽ ce+

sar yssyd vrenhin. ac nyt iessu. kanys ef a doth dewinyon o|r

dwyrein. ac anregyon ganthunt y vynnu offrymu idaỽ. A

phan gigleu eraỽdyr ganthunt ỽy ry eni brenhin y|mynnas+

sei eu ỻad. A phan|wybuwyt hynny y kymerth Joseph y dat

Jessu a|e uam. a ffo y|r eifft ac ef a|orugant. Ac yna yd erchis

eraỽdyr ỻad hoỻ ueibyon bethleem a|e theruyneu hyt yn oet

dwy·vlỽyd y lad Jessu ygyt ac ỽynt. A phan|gigleu pilatus

hynny ofynhau a|oruc. a gỽedy gostegu y bobyl govyn. ae|hỽnn

a geissyei eraỽdyr. Hỽnn heb ỽynteu. Ac yna kymerth pila+

tus dỽfyr y ymolchi yng|gỽyd y bobyl. a|dywedut bit y waet ef

arnaỽch chỽi. ac ar aỽch meibyon. Ac yna yd erchis pilatus