LlGC Llsgr. Llanstephan 27 (Llyfr Coch Talgarth) – tudalen 144r
Purdan Padrig
144r
yr honn y gỽesgereist ti yn ỻauuryus. yn gymeint. ac
na mynneist aros dyd dy angeu. namyn y|th vuched
rodi dy eneit a|th gorff ynni y·gyt. Hynn a|wnaethost
di ual y kaffut tal a|vei vỽy gennym ni. Titheu a geffy
gennym ni yn amyl yr|hynn a heydeist nyt amgen poen+
eu a|doluryeu. O|r mynny di hagen ymchoelut gan hynn
dy·vot ỽrth yn|kyngor ni. a gỽassanaethu ynni rac ỻaỽ
ual hyt hynn. ninneu a|wnaỽn ual yn ỻe kyfarỽs ˄y ti
dy dỽyn y|r porth y doethost y myỽn idaỽ yn|didrỽc ual
y keffych lewenyd yn|y byt etto. ac na choỻych esmỽyth+
der dy gorff oỻ o|th dyuot yma yn aỽr. Hynn a adaỽs+
sant ỽy idaỽ ef y geissaỽ y dỽyỻaỽ o|e haruthder a|e hof+
yn a|e hegarỽch. Y marchaỽc gỽir y grist hagen ny
chyffroes ef nac o aruthder nac o hegarỽch y adu y dỽ+
yỻaỽ. namyn o vn·ryỽ vryt eu tremygu a|e haruth·der
a|e hegarỽch heb atteb udunt o|dim. Odyna pan we+
les y|dieuyl y marchaỽc yn eu tremygu. Sef a|wnaeth·a+
nt ỽynteu y achub ef yn aruthyr. a rỽymaỽ y dwylaỽ
a|e draet. a|chyweiryaỽ tandaỽt uaỽr yn|y ty. ac yn|y
gynneu honno y bỽryassant ỽy y marchaỽc yn rỽym
ac a|bacheu heyrn y dynnu hỽnt ac yma trỽy y tan
dan lefein. Pan vỽrywyt ef gyntaf yn|y tan trỽm oed
ganthaỽ y boen. a phan goffaaỽd ef dechreu ym·gadarn+
hau yn duỽ y vrenhin ef. ac ym·gyweiryaỽ yn arueu
ysprydaỽl. a milwryaeth o newyd mal y dysgassit idaỽ
ny bu dim ganthaỽ y boen. a phan|vu aruthyr gan+
thaỽ y vot yn|y tan y galwaỽd enỽ iessu grist. ac ar
| « p 143v | p 144v » |