LlGC Llsgr. 3035 (Mostyn 116) – tudalen 58r
Brut y Brenhinoedd
58r
Ac odyna kymry oll megys y keidỽ hafren ỽrth archescobaỽt
kaer ỻion ar ỽysc.
A gỽedy daruot y|r deu ỽrda hẏnnẏ gatholic llunyaeth+
u pop peth yn wedus o|r a|berthynei parth a|r lan
fyd. ymchoelut a orugant drachefẏn parth a|rufein
A|datkanu y eleuterius pap pop peth o|r a|wnathoedẏnt
A|chadarnhau a wnaeth y pap pop peth o|r a|wnathoedynt
ỽynteu. A gỽedy kaffel o·nadunt y kedernit hỽnnỽ yd ym+
hoelassant drachefẏn y ynys brydein a ỻawer o getym+
deithon dỽywaỽl y·gyt ac ỽynt A|thrỽy dysc ẏ rei hẏnẏ
yn enkyt bychan y bu gadarn fyd y brytanyeit A|phỽẏ
bẏnac a vynho gỽybot enweu y gỽyr hynny. keisset yn|y
ỻyfẏr a yscrifenỽys gildas o volyant emrys wledic
kanẏs yr hyn a yscrifenei gỽr kymeint a|hỽnnỽ o eglur
draethaỽt nyt reit ymi y|atnewydu ef. ~
A gỽedy gỽelet o les diwyỻwyr cristonogaỽl fyd
yn kynydu yn|y teyrnas diruaỽr lewenyd a gym+
erth yndaỽ A|r tired a|r kyfoeth a|r breinheu a oed
y demleu y dỽyweu yr kynt no hynẏ. Y|rei hynny a|rodes
ef y duỽ a|r seint yn dragywydaỽl gan eu hachwene+
gu yn vaỽr o dir a dayar a breinheu a noduaeu a|rydit
Ac ym|plith y gỽeithredoed da hynnẏ y teruynỽys ỻes
vab coel y vuched yg|kaer loyỽ. Ac yd aeth o|r byt hỽn
y|teyrnas vab duỽ A|e gorff a gladỽyt yn enrydedus
yn yr eglỽys benaf yn|y dinas A sef amser oed hỽnỽ
vn vlỽydẏn ar|bymthec a deugein a|chant gỽedy dy+
uot crist y|mru yr arglỽydes veir vẏrẏ ~ ~ ~
A gỽedy marỽ ỻes ac nat oed idaỽ vn mab a wle+
dychei yn|y ol. Y|kyuodes ter·uysc yrỽg y|brytan+
yeit Ac y|gỽahanỽẏs arglỽydiaeth gỽyr rufein.
| « p 57v | p 58v » |