LlGC Llsgr. 3035 (Mostyn 116) – tudalen 78r
Brut y Brenhinoedd
78r
efyr vendigeit y vab ynteu A|e vrdaỽ yn vrenhin arna+
dunt A dechreu ymlad a|r saeson A gỽneuthur a·eruaeu
maỽr creulaỽn onadunt Megys yd oed da gan duỽ y
wneuthur onadunt A|phedeir brỽydyr a vu rỽg gỽerth+
euyr a|r saeson. Ac ym pop vn y goruu ef drỽy nerth duỽ
Yr ymlad kyntaf a vu idaỽ ac ỽynt ar a·von derwenyd
A|r eil a vu ar ryt epifort. Ac yna yd ymgyfaruuant
kyndeyrn vab gỽrth·eyrn a|hors braỽt hengyst Ac y ỻa+
daỽd pop vn y|gilyd Y|trydyd ymlad a vu ar lan y|mor ~
Ac yna y|ffoes y|saesson yn wreigaỽl y eu ỻogeu. Ac yd
aethant hyt yn ynys tanet. y geissaỽ ym·gadỽ yno.
Ac eissoes gỽedy eu damgylchynu o|werthefyr ac eu
blinaỽ o peunydyaỽl ymlad mal na eỻynt y diodef.
Sef a|wnaethant anuon gỽrtheyrn a vuassei gyt a|r
saeson yn porth vdunt ym pop brỽydyr ar werthefyr
y|vab y erchi idaỽ canhyadu vdunt mynet y eu gỽlat
yn ryd A thra yttoed yn kymryt eu kygor ymdanadunt
Sef a wnaethant kymryt eu ỻogeu ac adaỽ eu gỽra+
ged ac eu meibon a fo hyt yn germania ~
A gỽedy kaffel o werthefyr y vudugolyaeth honno
dechreu a|wnaeth ynteu talu y baỽb y dylyet a|r
daroed y|r saeson y dỽyn y arnadunt. Ac enrydedu
y|wyr a|chadỽ jaỽnder ac ỽynt Ac y·gyt ac ỽynt atne+
wydhau yr eglỽysseu ac eu hanrydedu ỽrth gygor gar+
mon escob. Ac eissoes kyghoruynu a|wnaeth dieỽl ỽrth
y dayoni ef. A dodi yg kalon Ronwen y|lysuam medỽl
y y·strywyaỽ y ageu. A gỽedy medylyaỽ oheni pop ys+
tryỽ o|r diwed Sef a wnaeth rodi gỽenỽyn idaỽ yn ỻaỽ
vn o|e wassanaethwyr A gỽedy kymrẏt y gỽenỽyn oho+
naỽ clefychu a wnaeth o ỽrthrỽm heint yn deissẏfyt
| « p 77v | p 78v » |