LlGC Llsgr. 3036 (Mostyn 117) – tudalen 168
Brut y Brenhinoedd
168
ducsant yno vynt pan yttoedynt yn pressỽylaỽ iwer+
don. Sef achaỽs oed hynny pan delhei heint neu
gleuyt ar vn onadunt. Sef y|guneit ennein yg
kymherued pedryual y mein. Ac y golchynt y me+
in ac y byrynt y|meỽn yr ennein. Ac yn|y dỽfyr rin+
wedaỽl hỽnnỽ y caffei y claf iechyt o pop kyfryỽ
heint o|r a uei arnaỽ. Ac odyna y kymyscit llysseu
ar dỽfyr hỽnnỽ. Ac a hỽnnỽ y iecheit guelioed y
rei brathedic. kanyt oed yno vn maen heb vede+
ginyaeth rinwedaỽl arnaỽ. A guedy clybot o|r bry+
tanyeit bot y ryỽ rinwedeu hynny ar y mein. ỽy+
nt a|gaỽssant yn eu kyghor kyrchu y mein. Ac
ymlad a gỽyr iwerdon o|cheissynt eu lludyas. Ac
yna yd etholet vthyr pen·dragon braỽt y brenh+
in. A phymthec mil o wyr aruaỽc ygyt ac ef y uynet
yr neges honno. A myrdin ygyt ac|ỽynt. hyt pan
vei trỽy y|dysc ef a|e ethrylith y|gunelit y neges.
AC yn yr amser hỽnnỽ yd oed Gillamỽri yn vren+
hin yn iwerdon. Guas ieuanc enryued y vol+
yant a|e glot. A phan gigleu y|gỽr hỽnnỽ ry|dyf+
ot y brytanyeit yỽ wlat; kynnullaỽ llu maỽr a
wnaeth a|dyuot yn|y erbyn. Ac eissoes pan ỽybu
achaỽs eu dyuotedigaeth. Sef a|wnaeth chwer+
thin. A dywedut yỽ getymdeithon val hyn. A
wyrda heb ef nyt ryued genhyf|i gallu o gened+
yl lesc an·reithaỽ ynys prydein rac eu hynuyttet
ac eu symlet. Kanys pỽy a|gigleu eiroet gynt y
| « p 167 | p 169 » |