LlGC Llsgr. Peniarth 11 – tudalen 72v
Ystoriau Saint Greal
72v
Kystal yỽ hynny a|n arglỽyd ni nyt yttoed yn mynnu kyt+
synyo a ỻygru o|r vn o·honunt ỽy y gilyd. ac am hynny yd
anuones duỽ dydi hyt yno o|e gỽahanu ỽy. ac y|lesteiryaỽ
arnunt pob un lygru y gilyd. a|thitheu a|e ỻesteiryeist o
ewyỻys da. pan edeist dy vraỽt ym mysc y elynyon ym peri+
gyl anghev. Eissyoes y gỽr yr oedut ti yn|y wassanaeth a
vu yno yn|dy le di. yn gystal ac y dangosses ef y wyrtheu yn ̷
gymeint o|th garyat ti ac y syrthyassant y marchogyon y|r
ỻaỽr yn|veirỽ. Ac ynteu yna a|gymerth y arueu ac a|gychỽ+
ynnaỽd ymeith o|e bererindaỽt. ac am yr antur hỽnn ti a|wy+
bydy wirioned yn ehegyr. A|phana bei wybot o duỽ o·honat
ny dangossei yt antur kyn|decket ac y gaỻut ti rydhau y
corff o|boen angheu. a|r eneit o uffern. a|ỻyna vi gỽedy dywet+
ut ytti synhwyr yr anturyeu a|r gỽeledigaetheu a|weleist di.
Gwir a|dywedy di arglwyd heb ef. ti a|e dywedeist ym yn da.
a minheu a|vydaf weỻ|gỽr tra vỽyf vyỽ. Yr duỽ heb yr abat
gỽedia duỽ drossof|i. kanys kynt debygaf|i y gỽe˄rendy duỽ dy+
di no|miui. Ac ynteu adawaỽd yna megys dyn kewilydyus.
a gỽedy ymdidan ruthur ohonunt. bỽrt a|gychwynnaỽd yme+
ith odyno. ac a|uarchokaaỽd yn hyt y|dyd. a|r nos honno ef
a|lettyaỽd yn|ty wreic wedỽ. A|thrannoeth ef a|uarchockaaỽd
yny doeth y ymyl casteỻ a|oed myỽn glynn. ac yno ef a gyfar+
vu ac ef gỽas ieuanc yn mynet parth a|r fforest. a bỽrt a o+
vynnaỽd idaỽ a|wydyat ef vn chwedyl newyd. Gỽnn heb
ynteu. a·vory y bore y|byd yma tỽrneimant geyr bronn y cas+
teỻ. y·rỽng iarỻ y gỽastaỽt a|e dylwyth. a|r wreic wedỽ o|sa+
reus.
| « p 72r | p 73r » |