LlGC Llsgr. Peniarth 18 – tudalen 30v
Brut y Tywysogion
30v
ap Gruffud y bererindaỽt ac yd edwis* y holl
uedyant a|e allu y|ghadỽraeth Meredud a rys
y vrodyr yny delei ef. Ny ulỽydyn honno y
bu estyfyn vrenhin y|gỽr a|gynhelis vrenhi+
nyaeth loegyr y dreis yn ol henri vab gỽilim
bastart. A gỽedy hỽnnỽ y doeth henri vab yr
amherodroes* y loegyr ac y|kynhelis holl loe+
gyr yn|y ulỽydyn honno y bu varỽ griffri ap
gwyn. Ny ulỽydyn racỽyneb y bu varỽ
Meredud ap gruffud ap Rys brenhin kredigy+
aỽn ac ystrat tywi a dyuet. yn|y bemhet ulỽ+
ydyn ar hugein o|e oet gỽr a oed diruaỽr y|d+
rugared ỽrth tlodyon ac ardyrchaỽc y gedernit
ỽrth y elynnyon a|chyfoethaỽc o|gyfyaỽnder. yn|y
ulỽydyn. honno y bu uarỽ Jeffrei escob llan daf
a rosser Jarll henffor. Y vlỽydyn racwyneb pan
gigleu rys ap gruffud vot ywein gỽynned y eỽ+
ythyr yn dyuot a llu gantaỽ y gredigyaỽn yn di+
lesc y kynullaỽd ynteu lu ac y doeth hyt yn aber
dyui ac yno y gorffỽyssaỽd ar veder ymlad a|ro+
di brỽydyr y ywein gỽynned a|e lu. ac ny bu bell
wedy hynny hyt pan wnaeth yno gastell. yn|y
ulỽydyn honno y gỽnaeth Madaỽc ap Meredud
arglỽyd powys gastell y|ghaer einaỽn yn ym+
yl kymer. Yn|y ulỽydyn honno y dieghis Meu+
ryc ap Gruffud nei y dywededic vadaỽc o|e garch*.
| « p 30r | p 31r » |