LlGC Llsgr. Peniarth 32 (Y Llyfr Teg) – tudalen 68
Llyfr Iorwerth
68
gorfflan heb greireu arnaỽ. a|e ysgrybyl y·gyt
ac ysgrybyl y clas a|r abadeu hyt yd elont beỻaf
ac yd erkeitont eu buches tra·chefyn. O deruyd. bot
creireu ar dyn. a gỽneuthur cam o·honaỽ dan
y creireu; ny dyly y amdiffyn o|r creireu hynny
kan ny|s haedaỽd. Messur corfflan yỽ erỽ gyfrei+
thaỽl yn|y hyt a|e phen ar y uynwent. a hynny
ygkylch y vynwent y dyly bot yn gỽmpas. O|deruyd.
bot eglỽys a dywetto dylyu kynnal dyn seith
mlyned heb wneuthur iaỽn neu yspeit a vo
hỽy; a bot yr arglỽyd a vo ar y wlat yn gỽrthỽy+
nebu idi am hynny. ac yn dywedut nat ytiỽ y
ganthaỽ ef idi hi y breint hỽnnỽ. Reit yỽ y|r
eglỽys bot idi a|gattwo y breint hỽnnỽ o tyston
deduaỽl. ac os keiff; gatter idi yn diwarafun y
breint. ac o·ny|s keiff hitheu; hebryghet yr eglỽys
ef ual y dylyo oreu. neu ynteu gỽnaet iaỽn o|r
agkyfreith ry digones.
D Eu amser y byd agoret kyfreith. am|tir a daear.
a deu y byd kaeat. O naỽuettyd kalan
gaeaf y byd agoret; hyt naỽ·uettyd chwefraỽr.
O naỽuettyd chwefraỽr y byd kaeat kyfreith. hyt
naỽuettyd o vei. O naỽ·uettyd o vei y byd ago+
ret kyfreith hyt naỽ·uettyd gỽedy aỽst. O naỽ·uettyd
o aỽst y byd kaeat kyfreith. hyt naỽ·uettyd gỽedy
kalan gaeaf. Sef achaỽs y byd kaeat kyfreith. y kyn+
| « p 67 | p 69 » |