LlGC Llsgr. Peniarth 46 – tudalen 244
Brut y Brenhinoedd
244
chu a|r wnathoed Emreis o vrth ̷ ̷+
rỽm heint a|chleuyt. a phan gigleu
pasken a giỻamỽri. a|e ỻuoed hynny.
ỻawenhau a|wnaethant yn uaỽr O te+
bygu bot yn haỽs udunt goresgyn. ynys. prydein.
achos bot Emreis yn claf. ac yna dyness ̷+
au a|wnaeth un o|r saesson a|elwit eoppa at
pasken. a|dywedut vrthaỽ yn|y wed hon ~
Pa ueint heb ef o da a|rodut ti y|r neb a|lad+
ei Emreis wledic. ac yna y|dywaỽt pasken
Dioer heb ef Bei caffỽn dyn a aỻei wneuthur
a|dywedy di. Mi a|rodỽn idaỽ teir Mil o pun+
hyoed aryant. a|m caryat inheu tra uyhỽn
uyỽ. AC O damweinhei y Mi caffel coron. ynys.
prydein. Mi a|e gỽnaỽn yn iarỻ kyuoethauc. a
hynny a|cadarnhaỽn trỽy aruoỻ. ac yna y
dywaỽt Eoppa vrth pasken. Miui a|dysgeis
ieith y bryttanneit. ac a ỽn y deuaỽt a|e Moes
a chyuarwyd vyf yg keluydyt Medeginaeth
ac vrth hynny o chywiry di y Mi yr hyn yd
vyt yn|y adaỽ. Minheu a|dywedaf uym bot
yn bryttỽn ac yn uedyc da. ac yuelly Mi a
caffa uynet y Myỽn rac bron y brenhin et cetera
| « p 243 | p 245 » |