Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 37v
Ystoria Lucidar
37v
megys deueit yn vffernn y gossodir. ac aghev
a|e pyrth. Beth vyd y|rei kywreint. Mynet
hayach yg|kyfuyrgoll. kannys pob peth o|r a
wnelont drỽy dỽyll y|gỽnant. Ac am|yr rei
hynny y|dywedir. Nyt oes tyỽyllỽch. na gỽas+
gaỽt aghev a|gudyho y|nep a|wnnel ennwir+
ed. Beth a|dyỽedy di am|y penytỽyr. Ar gyoed
na alỽ di wynt yn benytwyr. namyn yn wat+
ỽarỽyr am duỽ. kannys kellỽeiraỽ duỽ a|wn+
nant. ac eu tỽyllaỽ e|hun. a|llyỽenhav a|wn+
ant pann wnelont drỽc. a|hynny yn|y pethev
gỽaethaf. pann ladont dynyon y kanant. pann
wnelont buteinrỽyd y|llyỽenhaant. pann tyg+
hont anudonev neu pann letrataont y|chỽar+
dant. pann vont yn|y penyt y keissant amra+
uaelon anregyon. ac y|medỽant o amryuae+
lon wirodeu. a chymryt yn vỽy noc ereill gor+
modyon a|wnant. Ac am y|rei hynny y|dyỽe+
dir. yr arglỽyd a|dyry eu kic yr pryuet. Ac yr
tan ny diffyd. Beth am y dynyon fol. ygyt
ar dynyon bychein y|kyfurifir ỽynt. kanny
wdant gỽnneuthur gỽell. Ac am hynny y|di+
eithrir wynt. Beth am lauurỽyr y|dayar.
rann vaỽr onadunt a iacheir. kannys buched+
occav a|wnant yn vul. a|phorthi pobyl duỽ
| « p 37r | p 38r » |