Rhydychen, Llsgr. Coleg yr Iesu 57 – tudalen 170
Llyfr Blegywryd
170
Gỽerth y theth. dỽy geinyaỽc cotta. vn werth
vyd iỽrch a|gauyr. ~ ~ ~
P archeỻ yn|y growyn. keinyaỽc. kyfreith. a|dal. o|r
pan el aỻan. hyt pan atto dynu. dỽy geiny+
aỽc. kyfreith. Pan beito a|dynu. pedeir keinyaỽc. kyfreith. a|dal.
hyt ỽyl Jeuan yn|y kynhaeaf. Odyna hyt galan
Jonaỽr. dec keinyaỽc. kyfreith. a|dal. hyt yr un|wyl ieuan
elchỽyl. deudec keinyaỽc. kyfreith. ac yna deuparthaỽc
vyd yr eneit ar y kic. hyt galan Jonaỽr. dec ar
hugeint a|dal. Ac yna deuparthaỽc vyd y kic
ar yr eneit. Nyt oes werth. Kyfreith. knyỽ hỽch hyt
ym|penn y vlỽydyn. ac yna kyfreith hỽch maỽr
a gymer. Pop peth ar|ny|bo arnaỽ gỽerth. kyfreith.
damdỽng a geffir amdanaỽ herỽyd kyfreith
howel. Rys uab gruffud arbennic deheubarth
trỽy duundeb a*|welet*. a|ossodes gỽerth damdỽng
ar bop ỻỽdyn. nyt amgen. no thyngu o|r perch+
en y talei y lỽdyn y gỽerth a|wnelei arnaỽ. ac y
kaffei yna yrdaỽ. Y neb a|wertho moch. bit y+
danunt rac y vynyglaỽc tridieu a|their·nos.
| « p 169 | p 171 » |