LlGC Llsgr. 3036 (Mostyn 117) – tudalen 222
Brut y Brenhinoedd
222
mal na ellit mynet udunt namyn yn llog neu ys+
craf. A guedy caffel yscraff onadunt. Anuon bed+
wyr a| wnaethant o|r blaen y geissaỽ diheurỽyd y
ỽrth y kaỽr. A phan deuth parth a| phen y| mynyd lle+
ihaf. nachaf a| glyỽ gureigaỽl gỽynuan a drycyr+
uerth. Sef a| wnaeth ynteu megys pedrussaỽ ac
ofynhau o tebygu y mae y kaỽr oed yno. Ac eissoes
galỽ y leỽder attaỽ a dispeilaỽ cledyf a chyrchu
penn y mynyd. A phan daỽ yno. nyt oed yno namyn
gurach uaỽr yn eisted ỽrth tanllỽyth. Ac yn ỽylaỽ
uch penn bed newyd gladu. Ac ygyt ac y guelas
hi vedwyr; y dywaỽt ỽrthaỽ dan icuon ac ỽylaỽ.
O tidi direitaf o|r dynyon py ryỽ direiti antyghet+
uenaỽl a|th ry| duc di yr lle hỽn. ny ellir adraỽd na
thraethu y| gnifer poen yssyd paraỽt itt. yr aỽr hon
y daỽ yr yscymunedic aghynuil yr hỽn a duc elen
nith hywel vab emyr llydaỽ yr hon a gledeis i yr
aỽr hon yn| y bed hỽn. Ac am duc inheu y mama+
eth y gyt a hi hyt yma. A guedy keissaỽ o·honaỽ
ef kydyaỽ a hi. Ac na|s gallỽys. yn hynny y bu va+
rỽ hi rac y ofyn ef. A duỽ a alwaf inheu am hene+
int yn tystolyaeth ry dỽyn treis o·honaỽ ef arn+
af inheu guedy hynny. Ac ỽrth hynny ffo ditheu
vyg karedic i rac ofyn y dyuot ef yn herwyd y| gy+
neuaỽt y| gydyaỽ a| miui a|th odiwes titheu yn| y
wed hon. a| threulaỽ blodeu dy ieuenctit a|th lad.
A| thruanhau a| wnaeth ynteu o dynaỽl anyan ỽrthi
| « p 221 | p 223 » |