LlGC Llsgr. 3036 (Mostyn 117) – tudalen 57
Brut y Brenhinoedd
57
teu y doeth armael y vraỽt. Ac yn ol arthmael y| doeth
eidol. Ac yn ol eidol y doeth Rydyon. Ac yn ol Rydy+
on y doeth Ryderch. Ac yn ol Ryderch y doeth sawyl
penuchel. Ac yn ol sawyl y doeth pyrr. Ac yn ol pyrr
y| doeth kapoir. Ac yn ol kapoyr. y| doeth Manogan.
y vab gỽr prud hynaỽs oed hỽnnỽ. Ac yn ol Mano+
gan y doeth beli maỽr y vab ynteu. A deu vgeint
mlyned y bu vrenhin ar ynys prydein. Ac y hỽn+
nỽ y bu tri meib. llud a chaswallaỽn. a nynhyaỽ.
A guedy marỽ beli maỽr y| gunaethpỽyt llud y
mab hynhaf idaỽ yn vrenhin. Y| gỽr a| uu guedy hy+
nny ogonedus adeilaỽdyr caeroed a dinassoed.
hỽnnỽ a atnewydỽys muroed llundein a|e tyreu.
A chyt bei lawer idaỽ o dinassoed ereill. hỽnnỽ ei+
ssoes a garei ef mỽy no|r vn. Ac ỽrth hynny y| gel+
wit kaer lud. A guedy hynny y| gelwit llunde+
in gan lygru yr enỽ. A phan uu uarỽ llud y clad+
ỽyt yn llundein ger llaỽ y porth
a elwir etwa o|e enỽ ef porth llud yg|kymraec. Ac
yn saessnec ludysgat. A deu vab a uu idaỽ ynteu.
auarỽy. a| theneuan. A phan uu varỽ llud; nyt oed
oet ar vn onadunt val y gellit y wneuthur yn
vrenhin. Ac ỽrth hynny y gỽnaethpỽyt kaswall+
aỽn eu hewythyr yn vrenhin. Ac ymdrycha+
uel a| wnaeth ynteu yn haelder a dayoni. hyny oed
y uolyant tros y teyrnassoed pellaf. Ac ỽrth
hynny y kauas ynteu bot yn vrenhin. Ac eissoes
| « p 56 | p 58 » |