LlGC Llsgr. Peniarth 11 – tudalen 63v
Ystoriau Saint Greal
63v
Ac yno y bu ef y nos honno. A|thrannoeth y bore ef a|doeth y
meudỽy attaỽ. ac a|rodes peis wenn idaỽ. honn heb ef a|wisgy di
yn|ỻe crys. ac yn enỽ penyt. ac ynteu yna a|e kymerth. ac a|e
gỽisgaỽd ymdanaỽ. ac odyna y arueu. ac a|doeth y|r capel. ac a
gyffessaỽd kỽbyl o|e bechodeu. Ac ef a|e kafas y meudỽy ef
yn|gystal y uuched ac yd oed ryued ganthaỽ. ac na|buassei idaỽ
eiryoet achaỽs a|gỽreic. namyn vn weith yng|kat helian wynn.
o|r achaỽs y dylyei diolỽch o|e|arglỽyd. A|gỽedy daruot idaỽ efo
gyffessu. a|chymryt y benyt. ef a|adolygaỽd y|r|gỽr|da yr duỽ roi
idaỽ gorff y arglỽyd. a|r|meudỽy a erchis idaỽ aros yny darffei
offeren. ac ynteu a|dywaỽt y gỽnaei yn ỻawen. Ac yna yd aeth+
ant y|r offeren. a phan daruu yr offeren ef a|doeth y meudwy ac
a rodes idaỽ korff y arglỽyd. ac a|dywaỽt weldyna di beỻach yn
weỻ dy arueu noc yd oedut gynt. a mogel ditheu rac ỻidiaỽ ar+
glwyd kystal ac yssyd ygyt a|thi. Ny|bo ymi o einyoes hynny
heb·y bỽrt. Ac yna kymryt y arueu a|oruc. a|chychwyn yme+
ith drỽy gennyat y meudỽy. a marchogaeth a|oruc ef yny
vu bryt gosper. ac yna ef a|edrychaỽd yn|yr awyr. ac a|weles ede+
ryn maỽr yn ehedec uch·benn henbrenn sych heb na deil na
ffrỽyth arnaỽ. a|gỽedy daruot idaỽ ehedec talym maỽr. yna
ef a|disgynnaỽd ar y prenn yn|y ỻe yd oed adar idaỽ e|hun. dy+
eithyr na wydyat ef pa veint. Eissyoes yd oedynt ỽy oỻ yn vei+
rỽ. a phan weles ef ỽyntỽy yn veirỽ. Yna ef a|e trewis e
hun a|e yluin y·dan benn y vronn. yny doeth y waet yn ffry+
dyeu aỻan. ac am eu penneu ỽynteu. ac yr aỽr y syrthyaỽd
y gỽaet gỽressaỽc arnunt ỽy. ỽynt a|gyfodassant yn vyỽ a|r
| « p 63r | p 64r » |