LlGC Llsgr. Peniarth 11 – tudalen 86v

idi yr hynn a|ovynnei idaỽ. Ac ynteu a|dywaỽt megys y neb

ny wydyat beth a|oed yn|y bryt y o·vyn idaỽ y dywedei yn ỻawen.

Arglỽyd heb hitheu ˄ti a vuost uedylgar di yn hyt y pythewnos

hỽnn. ac am hynny y gỽnn i dy vot ti yn medylyaỽ am beth nyt

ytwyt yn gaỻel dyuot y benn ac ef. ac am hynny mi a|vynnỽn

gaffael gỽybot beth yỽ dy vedỽl. kanys mi a|debygaf nat oes

yn|y byt dim ny aỻwyf|i dyuot y benn ac ef y·rỽng dy synnwyr

di a|r|meu inheu. Pan y kigleu selyf hi yn dywedut ueỻy ef

a vedylyaỽd os dyn o|r byt a|aỻei roi kynghor ar hynny y gaỻ+

ei hi. kanys ef a|welsei lawer kymhendaỽt y|genthi. Ac yna ef

a|dywaỽt y vedỽl idi. a hitheu yna a vedylyaỽd ychydic. a|gỽedy

hynny hi a|dywaỽt. Nyt reit ytti heb hi haeach o vedylyeit yn pe+

ri anrec y|r marchaỽc hỽnnỽ. ac yr adnabot o·honaỽ ynteu y

gỽydut ti y genit efo o|th lines di. ỻyma vyng|cret heb ynteu

na|s gỽnn i kanys y mae ỻawer o amser o hynn hyt hynny etto.

Myn|vyng|cret hi mi a|e dysgaf ytt. namyn dywet ti ymi yn

gyntaf pa veint o amser yssyd hynny. Mi a|debygaf heb ynteu

vot ynghylch trychant mlyned. Mi a|dywedaf heb hi pa delỽ y

gỽney di. par wneuthur ysgraff o|r prenn goreu a|aỻer y gaffa+

el a|pharaussaf. ac anhaỽssaf ganthaỽ drewi. Trannoeth y bo+

re y mynnaỽd selyf dyvynnu attaỽ kỽbyl o|seiri y wlat. A|gỽ+

edy eu|dyuot y·gyt ef a|orchymynnaỽd udunt wneuthuur yr

ysgraff oreu o|r|a|eỻynt y wneuthur o gyfryỽ brenn ny drewei

vyth. ac ỽynteu a|dywedassant y gỽneynt yn|y mod goreu

ac y|geỻynt ac y deisyfei ynteu. ac yna keissyaỽ y gỽyd a|wnaeth+

ant a|e|dechreu. Yna gỽreic selyf a|dywaỽt ỽrth y gỽr. arglỽyd