LlGC Llsgr. Peniarth 11 – tudalen 92v

attaỽ. Ac a|e gỽediassant ar dywedut udunt beth a|arỽydockei yr

hynn a|welsynt. A|dywedut idaỽ a|orugant ual y gỽelsant. a|phan

gigleu y meudỽy hynny ef a|dywaỽt. grassaỽ duỽ ỽrthyỽch heb|ef.

yr aỽrhonn y gỽnn j panyỽ chỽchỽi yỽ marchogyon urdolyon

iessu grist drỽy y rei y gorffennir anturyeu seint greal. kanys y

chỽi y dangosses duỽ y dirgeledigaetheu. kanys iessu grist e|hun

oed y gỽr a|welsaỽch chỽi. a|r pedwar ỻew oed y pedwar euangelys+

tor. ac yr ys|talym yd ymdangosses yn|y fforestyd yma y|r gỽyrda

creuydus. ac ny wybuwyt dyaỻ beth oed ef hyt yr aỽrhonn. Ac

ny byd ar ol hynn beỻach gỽr a|e gỽelo ueỻy ~  

P an glywssant ỽy y parableu hynny diolỽch y duỽ a|oru+

gant. ac ỽylaỽ o lewenyd am wneuthur o|duỽ yrdunt ~

beth kymeint ac ymdangos udunt yn annat neb. Yn hyt y dyd

hỽnnỽ y buant ỽy gyt a|r gỽrda. A thrannoeth y bore gỽedy offeren

peredur a|gymerth cledyf galaath yr hỽnn a|dynnassei o|r maen.

Ac a|dywaỽt ỽrth galaath y dygei ef hỽnnỽ o hynny aỻan. ac a+

daỽ y gledyf e|hun yno y·gyt a|r meudwy a|oruc. Gỽedy kychỽyn

odyno ỽynt a|varchockayssant hyt am hanner dyd. ac yna ỽynt

a|doethant y ymyl casteỻ kadarn tec. eissyoes nyt aethant ỽy y

myỽn. kanys nyt yttoed eu fford yn troi yno. A gỽedy peỻau o+

honunt y·chydic y ỽrth y casteỻ nachaf y gỽelynt yn dyuot yn eu

hol marchaỽc yn aruaỽc o bop arueu. yr hỽnn a|dywaỽt ỽrthunt.

arglỽydi heb ef a yttiỽ y verch honno yn uorỽyn etto. Yttiỽ myn

vyng|cret heb·y bỽrt. A|phan|gigleu ynteu hynny ef a ymauaelya+

ỽd a|ffrỽyn yr vnbennes. ac a|dywaỽt ỽrthi. Ny dienghy di odyma

heb ef yny gỽpleych aruer y casteỻ racko. Pan|weles peredur y