LlGC Llsgr. Peniarth 190 – tudalen 161
Ystoria Lucidar
161
tragywyd. ac megys y goleuheir y rei
hynny o|r|tegỽch mỽyhaf. veỻy y byd y rei ere+
iỻ o|r aruthred mỽyhaf. ac megys y byd ys+
gaỽn y rei hynn o|r gỽeithret goruchaf. ve+
ỻy y byd gorthrỽm y rei ereiỻ o|r ỻesged mỽy+
af. ac megys y byd kadarn y rei hynn o|r
nerth pennaf. veỻy y|byd eidyl y rei ereiỻ
o|r gỽander mỽyhaf. ac megys y keiff y
rei hynn ehang rydit. veỻy y keiff y rei
ereiỻ kyuing geithiwet. ac megys y keiff
y rei hynn drythyỻỽch a|diruaỽr ewyỻys.
veỻy y keiff y rei ereiỻ chwerỽed a dirua+
ỽr drueni. ac megys y grymhaa y rei
hynn o arderchaỽc iechyt. veỻy y diffyc+
kya y rei ereiỻ o glefyt a gỽander. Ac me+
gys y byd budugaỽl a ỻawen y rei hynn
o wynuydedic vywyt. veỻy y kỽynant y
rei ereiỻ oc eu doluryeu hirhoedlic. Ac
megys y byd eglur y rei hynn o echdy+
wynnedigrỽyd doethineb. veỻy y byd tyỽ+
yỻ y rei ereiỻ o aruthred ynvytrỽyd. ka+
nys beth bynnac a wdont. ar achwanec
| « p 160 | p 162 » |