LlGC Llsgr. Peniarth 45 – tudalen 225
Brut y Brenhinoedd
225
glỽyd heb ef y bu diruaỽr ouyn arnaf ui gor+
esgyn o lesged y brytanneit o hir seguryt trỽy
ymrodi yr gỽledeu ar godineb. Canyt oes
pedrusder yny gỽledycho medaỽt a godin+
eb a charyat gỽraged a seguryt a|thaplys
Colli eu nerthoed ar kedernyt. A|llychwinaỽ
y clot ar anryded. Ac agos y pum mlyned yỽ
er pan ydym ni yn ymrodi y seguryt. Ac ỽrth
hynny y mae duỽ yn kyffroi gwyr ruuein
yn an herbyn ni y uỽrỽ llesged a seguryt y
ỽrthym y ymgoffau an milỽryaeth. Ac
yna y doethant hyt yg kor y keỽri.
AC gỽedy eu kyueisted paỽb herwyd y an+
ryded. Arthur a|dywaỽt ual hyn. Arglỽydi
uyg kyt·uarchogyon prouedic ar geueis i
aỽch kyghoreu hyt hyn yn rỽyd ac yn dyrys
ỽrth hynny synhỽrỽch pa atteb a|talhom yn
erbyn hyn. Canys beth bynhac a rac·uedylhy+
ho doethyon yn da. pan delher ar weithret
haỽs uyd y diodef. A|heuyt herwyd y tebyg+
af i nyt reit y mi ouyn gwyr ruuein Canys
trỽy anylyet y maent yn keissaỽ teyrnget
o ynys prydein. ỽrth dyuot ulkassar ac amhero+
dron ereill wedy ynteu a llu aruaỽc gantu
ac o treis ac anuundab yn ryeni ni goresgyn
| « p 224 | p 226 » |