LlGC Llsgr. Peniarth 46 – tudalen 68
Brut y Brenhinoedd
68
o pryt a gosged. a doeth a chymen a
dosparthus oed. ac ethrylithus ỽrth hely.
a chỽn. ac adar mal y dylyei teyrn. a|r
tywyssaỽc a gauas yn|y gyghor rodi
un uerch oed ydaỽ yn wreic y uran. ac
ony bei etiued o was canhyadu y uran y
gyuoeth gan y uerch. o bei hyn noc ef.
ac o bei ydaỽ ynteu. adaỽ porth y uran
y oresgyn y gyuoeth e|hun. a hynny o gyt ̷+
duundeb yeirll. a barỽneit. a marchog ̷+
yon urdaỽl. ac odyna ny bu ben y
vlỽydyn yny uu uarỽ segynn tywyss ̷+
aỽc byrgỽyn. a|r gỽyr a garei uran gynt
yn uaỽr oe o|e gedymdeithas. ny bu an+
haỽd ganthunt darystỽng o|e ỽrogaeth. a
guedy tynnu paỽb yn un uedwl ac ef
medylyaỽ a wnaeth dial ar ueli y uraỽt
y sarhaet. ac yna heb annot trỽy gyg ̷+
hor y wyrda kynghreiraỽ a freinc.
ual y caey yn hedỽch kerdet trỽydunt
a|e lu. hyt yn traeth flandrys. y le y llo ̷+
ngeu yn paraỽt. a guedy eu dyuot eno
hỽylyaỽ yny doethan enys prydein. a
| « p 67 | p 69 » |