Llsgr. Caerdydd 3.242 (Hafod 16) – tudalen 68

o|ebriỻ y|r|vreich assỽ. ac ny chyỻ ỻeuuer y lygeit vyth. Rac

dolur ỻygeit; kymer volwet cochyon. a ỻosc rỽng deu blisgyn

wy a briỽ yn|ỻudỽ a|dot yn|y ỻygeit a|da yỽ. Rac dolur|penn; kymer.

y|ryỽ. a briỽ gyt ac|oleỽ o ros ac ir dy dal a|th|aeleu ac ef a iach

vydy a|gỽeỻ vyd|dy olỽc. araỻ yỽ; kymer. deil eidyo y daear a|gỽynn+

wy a|briỽ ygyt. a|dot ỽrth dy dal a iach vydy. araỻ yỽ; gỽna leis+

so o|bluf gỽeỻt keirch. ac a hỽnnỽ golch dy benn dỽy·weith yn

yr|wythnos. nyt amgen duỽ merchyr a|duỽ sadỽrn. a|gỽybyd

vot y|dỽfyr yn|dỽym iaỽn a iach vydy. Araỻ yỽ; kymer betoni

ac|eidyo y|daear gogymeint pob un a|e|gilyd. a bỽrỽ myỽn dỽfyr.

ac a|r|dỽfyr hỽnnỽ yn dỽymaf ac y|geỻych y|diodef golch dy benn.

dỽyweith yn|yr wythnos nyt|amgen duỽ merchyr a|duỽ sadỽrn.

a iach vydy. Rac gỽaetlin rydegaỽc; kymer y|waetlys a|tharaỽ

ar|dỽfyr ac yf ef. a|r|gỽaetlin a|dyrr. Rac gỽaetlin o archoỻ;

kymer. yr eirinllys a berỽ drỽy lefrith prud. a|dot y|mintan

yndaỽ yn|da a|gat ar|y|tan ef ias da ac yf ef bop bore. Rac gỽ+

aetlin froen; goỻỽng waet ar|y froen yn amrosgo. a gỽasc

rỽym da ar|y bys bychan idaỽ. Rac brath adyrcob; dot yr|ed+

not ỽrthaỽ. Rac brath neidyr; kymer. yr|erỻyryat. a|r bengalet

a|r benlas a|tharaỽ ar|dỽfyr ac yf. Rac ỻyngher; kymer win

a|th|drỽngk dy|hun. a|mintan. a|e kymyscu ygyt a|e yfet ar

dy|gythlỽng. neu gymer risc yr ysgaỽ. a|ric* yr|yspydat. a be+

rỽ ygyt ac yf bop bore. Rac dauadenne; kymer. dỽfyr|graỽn

o|r|gỽyd a|golch yn vynych. neu gymer suryon a dot ỽrthaỽ

yn dỽym. neu gymer y veidaỽc ac ir ac ef. Rac y|crygu kymer

y ganwreid. a|r|dynat coch. a|r erỻyryat. a berỽ yn|da trỽy

veid geifyr. ac yf gỽpaneit o hỽnnỽ bop bore. Rac dolur y