Rhydychen, Llsgr. Coleg yr Iesu 119 (Llyfr Ancr Llanddewi Brefi) – tudalen 69r
Ystoria Lucidar
69r
A chas yr engylyonn am lesteiryaỽ cỽplau eu
rif. hyt y|gallassant. A chas y|nef neỽyd. Ar day+
ar neỽyd a|phob creadur am lesteiryaỽ gỽellav
ev hansaỽd. tray|gallassant. A chas yr holl se+
int am lesteiryaỽ vdunt eu lleỽenyd trae
gallassant. Ryued yỽ eu gỽrthỽyneb. megys
na ellir medylyaỽ na chredu meint lleỽenyd
y|rei vchot. Velle ny ellir kyffelybu na traethv
meint poeneu y lleill. Ac am hynny y|gelỽir
ỽynt yn gyfuyrgolledigyon am eu dygỽydaỽ
y vrth uuched duỽ. Ny dyallaf|i hynny pann
adeilaỽd duỽ neỽad vrenhinaỽl idaỽ y|llithra+
ỽd y|paret pann dygỽydaỽd yr engylyon. A|ph+
ann vynnaỽd duỽ y gyỽeiraỽ yd anuones y
vap y|gynnullaỽ y|mein byỽ yr adeilat hỽnnỽ.
Ac y esgynnv yn|y gerbyt a|wnnaeth ef. a|dỽyn
y|meỽn attaỽ laỽein o|vein. Ac adaỽ y|rei a|dygỽ+
ydaỽd. Y kerbyt yỽ y|petuar angel ystor. Ar
ebestel yỽ y mein a|dynnassant yndaỽ ygrist
oc eu pregeth ar hyt y|byt. Ac a|gyn nullas+
sant llaỽer y adeilat y|duỽ. Y|rei a|dygỽydaỽd
o|r kerbyt hỽnnỽ yỽ y|dynyon ny chretto yn ia+
ỽn. megys y|dyỽedir. ỽynt a|aethant y vrthy+
ym ni. kanny hannhoedyn ohonam ni. Y rei
a|ducpỽyt yno a|gyfulehaỽt yn adeilat llys nef.
| « p 68v | p 69v » |