Rhydychen, Llsgr. Coleg yr Iesu 57 – tudalen 121
Llyfr Blegywryd
121
Dỽylaỽ. Deu troet. deu lygat. Deu glust. ffroeneu
yn|ỻe un aelaỽt. Dỽy wefus. Chỽe|bu a chweu+
geint aryant yỽ gỽerth pob vn o|r rei hynny.
O|r trychir clust dyn ymeith. a|chlybot o|r dyn
arnaỽ ual|kynt. dỽy uu a deugeint aryant a|dal.
Gỽerth bys dyn. buch ac ugeint aryant a|dal.
Gỽerth baỽt dyn dỽy vu a deugeint aryant a|dal.
Keiỻeu. kymeint yỽ eu|gỽerth. a|gỽerth yr ae+
lodeu vry oỻ. Tauaỽt e|hun kymeint yỽ y
werth a|gỽerth yr hoỻ aelodeu. Sef a|dal hoỻ
aelodeu dyn pan|gyfrifer ygyt wyth punt
a|phedwar ugein punt. Pedeir ar|hugeint
yỽ gỽerth gỽaet pob ryỽ dyn. Dec ar|huge+
int vu werth gỽaet crist. ac anheilỽng y
gỽelet* bot gỽaet duỽ. a gỽaet dyn yn vn|wer+
th. ac ỽrth hynny gỽaet dyn yssyd lei y werth.
Gỽerth racdant dyn yỽ. pedeir ar|hugeint
gan dri dyrchafel. Gỽerth kildant dyn yỽ dec
ar|hugeint aryant. Pan|daler racdant gỽe+
rth kreith o·gyfarch a|delir ganthaỽ. Gỽerth
| « p 120 | p 122 » |