LlGC Llsgr. Llanstephan 27 (Llyfr Coch Talgarth) – tudalen 19r

y|gan duỽ y gỽr yssyd gyfyaỽn vraỽdỽr. kanys a|wassanaetho

yn|da tal da a|geiff. os ỽynteu a|vydant anghyfyaỽn a gostỽg

y bobyl trỽy greulonder mỽy vyd eu poeneu noc ereiỻ. kanys

kaletach y bernir ar y pennaduryeit. a|barn heb drugared a

vyd ar y neb ny wnel trugared. discipulus Paham y godef yr etholedigyon

gỽrthỽynebed y byt hỽnn y·gyt a|r rei drỽc ac eu bot yn eu plith.

Magister Am ymdreidyaỽ onadunt y|myỽn petheu bydaỽl. ac am hyn+

ny y poenir ỽynt o aflondywch y byt hỽnn. a|duỽ hoỻ·gyfoeth+

aỽc ual y dywedir. Ef a|wnaeth pob peth o|r a|vynnaỽd. a|r|eil+

weith y dywedir. Ti a|eỻy bop peth o|r|a vynnych. discipulus Paham y

dywedir amdanaỽ ynteu vot ryỽ betheu ny dichaỽn|ef eu

gỽneuthur. megys dywedut kelwyd neu|wneuthur yr hynn

ny mynnaỽd y|wneuthur gynt. Magister Nyt an·aỻu hỽnnỽ. na+

myn goruchel aỻu. kannyt oes neb·ryỽ greadur a|aỻo y drossi

ef y symudaỽ yr hynn a|ossodes. discipulus Beth yỽ rac·weledigaeth

duỽ. Magister adnabotedigaeth y wybot y petheu rac ỻaỽ. ac eu

heturyt megys y petheu kyndrychaỽl. discipulus O|r gỽybu duỽ bop

peth o|r a|del rac ỻaỽ. a|dywedut trỽy y proffỽydi yr hynn a|de+

lynt rac ỻaỽ. ac ny eỻir y|dwyỻaỽ ef yn|y wyd. a|chynt hefyt

y|deruyd y nef a|r daear. noc y geỻir symudaỽ geir duỽ. ef a

welir ymi vot yn|dir dyuot pob peth ar ny damchweinassant

eiryoet. Magister Deu ryỽ anghenreit yssyd. vn anyanaỽl me+

gys kyfodi yr|heul yn|y dwyrein. neu dyuot y nos yn|ol y

dyd. ac araỻ ewyỻyssyaỽl. megys kerdet o|dyn neu eisted.

a|r|hynn a|vynno duỽ y vot megys nef a|daear. ny eỻir goch+

el na del hynny. namyn anghenreit yỽ eu bot. discipulus Beth yỽ o|r

damchweinya ueỻy petheu ereiỻ. a|at duỽ udunt vot megys