LlGC Llsgr. Llanstephan 27 (Llyfr Coch Talgarth) – tudalen 51v

y gaffel yn|yr amser y bo goreu y gaffel. neu beth a|vo kryno+

ach noc ef a|archỽn. Yn|y wedi uchot y dodir seith adolỽyn. ka+

nys deu·peth yn bennaf a|dyly mab ysprydaỽl y erchi y dat nefa+

ỽl. Sef ynt y rei hynny y diffryt rac drỽc a|rodi idaỽ da. Os da

a|erchir. tri ryỽ da yssyd. da nefaỽl. a da ysprydaỽl. a da amseraỽl.

Os da nefaỽl hỽnnỽ a|erchir trỽy y geiryeu hynn. Adueniat

regnum tuum. Sef yỽ hynny yng|kymraec. Deuet dy deyrnas

di arglỽyd ygyt. nyt amgen y rei yssyd yma. a|r rei yssyd yn|y

nef. Yr|eil|arch yỽ erchi rat ac ewyỻys da. drỽy y geiryeu hynn.

ffiat uoluntas tua sicut in celo et in terra. Sef yỽ hynny. Bit

dy ewyỻys da di arglỽyd megys yn|y nef ac yn|y daear. a hynny

dy wirioned a|th garyat. Y dryded arch yỽ. erchi da amseraỽl

neu anyanaỽl. ac ual hynn y dywedỽn ni. Panem nostrum

cotidianum da nobis hodie. Hynn yỽ synnỽyr y geiryeu hyn+

ny. Dyro di ynni arglỽyd yn reidyeu y rei ny aỻỽn ymgyn  ̷+

nal yn|y byt hebdunt beunyd. sef yỽ y petheu hynny iechyt

corff. a bỽyt a|diỻat ac ardymhereu. nyt amgen. coedyd a meys+

syd. a phrỽytheu ereiỻ. Ot eirch dyn gỽrthlad drỽc y|ỽrthaỽ.

tri ryỽ drỽc yssyd. nyt amgen y drỽc a|wnaetham ni kyn·no

hynn. a|hynny a|erchir trỽy y geiryeu hynn. Et dimitte

nobis debita nostra sicut et nos dimittimus debitoribus nostris.

ỻyma yỽ synnỽyr y geiryeu hynny. Madeu di arglỽyd yn

pechodeu ynni. megys y madeuỽn ninneu eu pechodeu y|r

rei a|wnaethant gam y|n herbyn. Yr eil|drỽc yỽ yr hỽnn a aỻo

dyuot ynni rac ỻaỽ. ac ual|hynn yr archỽn ni yn rydhau

ohonaỽ drỽy y geiryeu hynn. Et ne nos inducas in tempta+

cionem. Sef yỽ hynny. na at ti ynni arglỽyd dygỽydaỽ ym