LlGC Llsgr. 3035 (Mostyn 116) – tudalen 120v
Brut y Brenhinoedd
120v
y ryỽ ormes y| ar y| wlat Ac y·sef a| wnaeth hywel tris+
tau am agheu y vorỽyn y| nith. A gorchymyn gỽ+
neuthur eglỽys vch y phen yn| y mynyd y ỻe y| cha*+
dỽyt a hỽnỽ a elwir yr hyny hyt hediỽ bed elen.
A Gỽedy ymgynuỻaỽ paỽb ygyt o| r yd oedẏnt
yn| y arhos. arthur a gychwynỽys o·dyno hyt
yn aỽgustudỽm y ỻe y tybygei vot yr amher+
aỽdyr a| e lu yn dyuot A gỽedy y dyuot hyt ar
lan yr auon wen ym| bỽrgỽyn. ef a venegit idaỽ
bot yr amheraỽdyr gỽedy pebyỻaỽ nyt oed peỻ
o·dyno. A| chymeint o luoed gantaỽ ac y| dywedit
nat oed neb a aỻei gỽrthỽynebu idaỽ. Ac yr hẏnẏ
eissoes ny chynhyruaỽd arthur dim. Namyn gossot
y bebyỻeu a| e luesteu ar lan yr afon megys y gaỻ+
ei yn rỽyd ac yn ehang ỻunyaethu y lu o| r bei
reit idaỽ yn| y ỻe hỽnnỽ Ac odyna yd anuones
arthur bodo o ryt ychen. A gỽalchmei vab gỽyar
a| gereint garanỽys hyt ar amheraỽdyr rufein
y erchi idaỽ mynet o teruynheu freinc. neu tran+
oeth rodi kat ar uaes y arthur. Y ỽybot pỽy oreu
o·nadunt a dylyei freinc Ac annoc a| wnaeth jeu+
enctit ỻys arthur. y| walchmei wneuthur gỽrthgas+
sed yn ỻys yr amheraỽdyr Megys y geỻynt
gaffel gosgymon y ymgyfaruot a gỽyr rufein
Ac odyna y| trywyr hyny a gerdassant at yr am+
heraỽdyr ac a archassant idaỽ mynet ymeith
o| freinc neu ynteu tranoeth rodi kat ar uaes
y arthur. Ac val yd oed yr amheraỽdyr yn dywe+
dut nat mynet ohonei a| dylyei. namyn yn vỽy
dyfot y hamdiffyn ac y ỻywyaỽ. Nachaf quinti+
| « p 120r | p 121r » |