LlGC Llsgr. 3035 (Mostyn 116) – tudalen 51v
Brut y Brenhinoedd
51v
dehol inheu a|minheu a alwaf tystolyaeth nef a daẏar
na heydeis i defnyd y var ef gan y iaỽn Eithyr na rodon
vy nei y divetha yn|wirion Ac edrychet dy doethineb
di defnyd y lit ef. Damweinaỽ a|wnaeth y deu nyeint
in ni chỽare paelet. A|gỽedy goruot o|m nei. i. Sef a|wnaeth
nei y brenhin ỻidẏaỽ a|chyrchu y|ỻaỻ a|chledẏf Ac yn
hẏnnẏ y|syrthỽys nei y|brenhin ar y gledyf e|hun yny aeth
druydaỽ. a gỽedẏ dyuot hẏnnẏ ar y brenhin; yd erchis
ynteu vy nei. i. y dienydyaỽ dros y ỻaỻ. Ac ỽrth na|s
rodeis. i. y|mae ynteu yn anreithaỽ vyg kyfoeth|i ac y+
n|y distryỽ. Ac ỽrth hẏnnẏ yd ỽyf|i inheu yn gỽediaỽ dẏ
drugared. ti. Ac yn erchi nerth a|chanhorthỽẏ y|genhyt
ti y gynhal vyg kyfoeth|i. hyt pan vo drỽy vy nerth. ̷ ̷
inheu y kyffych titheu teily·gdaỽt teyrnas ynys prydein
Ac nat amheuet dy brudder di dim o|r ymadrodyon
hẏnẏ. kanys o|r defaỽt hon yd aruerant y rei marwaỽl
gỽedẏ irỻoned kymot ar tagnefed. A gỽedy ffo; ym+
choelut ar vudugolyaeth. ~ ~ ~ ~ ~ ~
A gỽedy edrych o vlkessar y ỻythyr hỽnnỽ. Sef a gafas
o gytgygor y|wyrda nat elhynt y ynẏs prydein yr
geireu y tyssaỽc* hỽnỽ ony delhei ỽystlon dilis a|eỻ+
it eu credu. A gỽedy kennattau hynny y|auarỽẏ. yn|di ̷+
annot yd anuones kynan y vab a deg|ỽystyl ar|hugein
o|dylyedogyon y|kyfoeth y·gyt ac ef. A|gỽedy dyuot y ỽstlon*
kychwẏn a|oruc vlkessar ar y|mor a|r ỻu mỽyaf a gafas
a|dyuot y dofyr y|r tir A|phan gigleu gaswaỻaỽn
hyny y doeth yn ymlad a|ỻundein. Ac ymadaỽ a|oruc
a|r dinas a bryssẏaỽ yn erbẏn yr amheraỽdyr a|e lu
Ac val yd oed yn dyuot parth a|cheint na·chaf wyr
rufein yn pebyỻaỽ yn|y ỻe hỽnnỽ Kanys avarỽy a|e
| « p 51r | p 52r » |