LlGC Llsgr. 3035 (Mostyn 116) – tudalen 93v
Brut y Brenhinoedd
93v
ereiỻ. A gỽedy gossot o·honaỽ yno pop peth o|r a vei reit y
wneuthur o dysc ac anoc eidal escob kaer loyỽ Ac yd aeth
hẏt y|manachloc yssyd ger ỻaỽ kaer garadaỽc yr hon
a elwir yn aỽr salsburi. kanys yno yd oedynt yn gorwed
y|tywyssogyon a|r|barỽnyeit a|parassei hengyst eu ỻad
drỽy vrat. Yno yd oed manachlaỽc a|thrychant mynach
y|mynyd ambyr; Y|gỽr megys y|dywedir a vuassei
fỽndỽr y vynachlaỽc hono yn gyntaf A|phan welas
emrys yn|yd oedynt y|meirỽ hyny yn gorwed. kyffroi
ar warder hyt ar dagreu a oruc. A|medylyaỽ a|oruc
yndaỽ e|hun py wed y|geỻit gỽneuthur y|ỻe hỽnnỽ.
yn enrydedus o enryfed weith a|parahei yn dragywyd
kanys teilỽg y barnei ef y ỻe hỽnnỽ o tragywydaỽl
enryded ỽrth verthyru yno y|saỽl dylyedogyon yn
wirion dros eu gỽlat. ~ ~ ~
A c gỽedy galỽ ohonaỽ attaỽ o|pop|ỻe seiri pren a rei
mein. Gorchymyn a oruc y brenhin vdunt arueru
oc eu hoỻ ethrylithyr a|cheissaỽ dechymic newyd
ar weith a|gatwei cof y saỽl vonhedigyon hyny yn en+
rydedus trỽy yr oessoed A gỽedy diffygyaỽ y ethrylithyr
y baỽb o·nadunt Ac nat vn a aỻei eilenwi damunet
y brenhin. tramor archescob kaer ỻion ar ỽysc a|dywa+
ỽt ỽrth y brenhin yn|y wed hon. Arglỽyd heb ef ny thy+
bygaf|i y|th teyrnas ti yr eil gỽr a aỻo kaffel o|e eth+
rylithyr e|hun dychemygu gỽeith a barhao megys
y|mynut|ti yn dragywydaỽl. onyt myrdin vard.
gỽrtheyrn. kanys hyspys yỽ genyf|i nat oes y|th teyrn+
as ti yr eil a vo kyn egluret y ethrylithyr ac ef y dywe+
dut petheu a vo rac ỻaỽ Ac y|dychymygu gỽeithre+
doed kywreint Ac ỽrth hẏnẏ par di dyuot hỽnnỽ attat
| « p 93r | p 94r » |