LlGC Llsgr. Peniarth 11 – tudalen 186r

ovyn di ymi vy henỽ. yny govynnỽyf|inneu ytti. Yna gỽalch+

mei a|gerdaỽd ymeith. a|r marchaỽc a|aeth y|r fforest. ac ny chyfar+

vydei neb a|gỽalchmei ar y fford yn vn|ỻe nyt amovynnei am

baredur ỽrthaỽ. A marchogaeth ueỻy a|wnaeth ef yny argan+

vu meudỽy yn|sefyỻ o|r tu aỻan o|e ty. ac ymgyuarch gỽeỻ a|ỽ+

naethant pob vn y gilyd o·nadunt. a|r meudỽy a|ovynnaỽd

idaỽ ef o ba le yd|oed yn|dyuot. Ac ynteu a|dywaỽt mae o tir ~

brenhines y morynyon. a weleist di heb ynteu baredur y mar+

chaỽc da yr|hỽnn a gymerth y daryan o lys arthur. Na weleis

yssywaeth heb·y gỽalchmei. Eissyoes marchaỽc urdaỽl a

tharyan eureit idaỽ a|dywaỽt y mi y bydei ef y* bydei* ef* yn|y

ỻannerch goch. Ef a|aỻei dywedut hynny yn wir heb y|meudỽy

os gaỻei neb. kanys efo e|hun a|oed yno. a|ỻyna paham y gỽnn

i hynny. nyt oes namyn dỽy nos yr pan orwedaỽd ef yma. ac

weldy racko y bitheiat a|duc ef o|lys arthur gyt ac ef. Ac

ynteu a|erchis ymi y anuon ef att y brenhin meudỽy y ewy+

thyr. Y·rof|i a|duỽ heb·y gỽalchmei os gỽir a|dywedy di ys af+

lỽydyannus y daruv y myui. Arglỽyd heb y meudỽy nyt

oes arnaf|i vn anghenreit y dyỽedut kelwyd. ac ar y ki y

geỻy di adnabot a ytỽyf|i yn|dywedut gỽir. Nyt y ryỽ daryan

honno heb·y gỽalchmei a|duc ef o|lys arthur. Mi a|wnn hynny

heb y meudỽy. Y daryan a|weleist di a|duc ef o ty Joseus veu+

dỽy. a mab yỽ hỽnnỽ y|r|brenhin meudwy y ewythyr ef. ac

yn|ty y meudỽy ieuanc hỽnnỽ y bu laỽnslot nossweith. pan

doeth y pedwar marchaỽc o herỽyr y ty. y rei a groges ynteu

drannoeth. ac yno y gedewis paredur y|daryan a|duc ynteu

o|lys arthur. a|m nei inneu ydiỽ y Joseus hỽnnỽ vab vy chwaer.