LlGC Llsgr. Peniarth 11 – tudalen 277r
Ystoriau Saint Greal
277r
les y ỻong yn peỻau y|r mor. a pharedur yn ymguraỽ a
phaỽb o|r a|oed yndi. a doluryus oed ganthaỽ nat yttoed yno
kynn peỻau y ỻong. ac ymchoelut a|orugant ỽy yn drist
o achaỽs paredur. kanys ny wydynt ỽy ym pa wlat y tiriei
y ỻong. a|phei geỻynt y hymlit ỽynt a|e hymlityynt. A
marchogaeth a|orugant yny gyuaruu marchaỽc ac ỽynt.
Gwalchmei a|o·vynnaỽd idaỽ o ba|le yr oed yn dyuot. ac yn+
teu a|dywaỽt mae o|lys arthur. Pa ryỽ chwedleu yssyd y
gennyt ti o·dyno heb·y gỽalchmei. arglỽyd heb y mar+
chaỽc rei drỽc iaỽn. kanys arthur yssyd yn ysgaelussaỽ
y hoỻ vilwyr o achaỽs briant o|r ynyssed. ac ef a beris car+
charu vn o|r milwyr goreu o|r ỻys. A wdost di pỽy oed y he+
nỽ ef heb·y gỽalchmei. Arglỽyd heb ynteu ef a elwit laỽns+
lot dy lac. ac neur daroed idaỽ enniỻ kỽbyl o|r hoỻ diroed
a|dugassit y gan arthur ac a goỻassei. ac ef a ladyssei
vrenhin magdalans. A|chỽbyl o|e vrenhinyaeth ef a|e
henniỻassei. ac a|e trossassei y gret grist. ac yr aỽr y dar+
uu idaỽ ef eu henniỻ ef a anuones y brenhin yn|y ol
a|hynny drỽy gyngor briant. ac ef a vyd ar arthur yn
ehegyr eissyeu kedymdeithyon. kanys brenhin claỽdas
yssyd yn|kynnuỻaỽ ỻu maỽr y·gyt ac ef. ar vedyr enniỻ
brenhinyaeth magdalans drachevyn. A gỽedy hynny
ef a|daỽ am benn arthur. a|hynny drỽy gyngor briant yr
hỽnn a anuones kennadeu a ỻythyreu att vrenhin claỽ+
das.
| « p 276v | p 277v » |