LlGC Llsgr. Peniarth 12 rhan ii – tudalen 55v
Ystoria Lucidar
55v
deduolaf briodas. neu a brynassant eu pechodeu o benyt ac
alussenneu. ỽrth y rei hynny y dywedir. Deuỽch chỽi y rei
bendigedic y deyrnas vyn tat i. kanys pan vu newyn arnaf
chỽi a rodassaỽch ym vỽyt. ac ueỻy y rif ef hoỻ weithretoed
y|drugared. discipulus A dywedir hynny o sein geiryeu. Magister Pan vo
crist yno yn ymdangos yn dyn. ac ỽynteu yn eu|kyrff yn
sefyỻ. ef a|eỻir credu mae geiryeu a vyd yno. a|chyt bo am+
lỽc y baỽp drỽy pa obrỽy y kyfyrgoỻir neu yd iacheir drỽy
y geiryeu hynny yn vỽyaf o|r y|dangossir ynn. discipulus Paham
yd iacheir ỽynt. neu pa delỽ y bernir. Magister Yn ỻys y ryd ef y
gỽyr y rei teilỽng hynny. discipulus Pỽy a|ant yng|kyvyrgoỻ heb
varn. Magister Y rei a bechassant heb varn. megys paganyeit ac
Jdewon a vuant gỽedy diodef crist. kanys angcret vu geitwa+
daeth eu dedyf ỽynt gỽedy diodeifyeint crist. discipulus A wyl y rei ~
hynny grist. Magister Gwelant yr drỽc udunt megys y dywedir. Wynt
a|welant yr hỽnn a vrathyssant. kanys yr hoỻ rei ennwir
a gytsynnyassant am angeu yr arglỽyd. discipulus Paham y dywe+
dir amdanunt na|chyfyt y|rei ennwir yn|y vraỽt. Magister Ny dam+
chweina udunt ỽy eu|barnu yno megys y gỽnaethant yma.
amdanunt ỽy y dywedir. Ti a|e gossody ỽynt megys kynneu
dan rac dy vronn di. discipulus Pỽy a vernir ac a|ant y|nghyvyrgoỻ.
Magister Jdewon a bechassant yn erbyn y dedyf kynn dyuot crist.
a|dryc·kristonogyon a|weỻygyassant grist o e dryc·weithreto+
ed. ỽrth y rei hynny y dywedir. kiliỽch y ỽrthyf|i y rei emeỻ+
digedic. kanny rodassaỽch ym vỽyt pan vu newyn ar+
naf. ac ueỻy am bop un o·honunt ual y ỻeiỻ y dywedir.
ac o|r|geiryeu hynny y|dangossir ym paham y kyfyrgoỻir
ỽynt.
| « p 55r | p 56r » |