LlGC Llsgr. Peniarth 190 – tudalen 210
Ymborth yr Enaid
210
nef a daear. ac uffern. A phan wehynyei
y serchaỽluab yspryt y|dwywaỽlserch ana+
dyl. ef a|gyfodei o·honaỽ y ber·arogleu y
baỽp. yn gymeint ac nat oed neb·ryỽ aro+
gleu. na rosys. na lilys. na neb·ryỽ ffrỽyth
na neb·ryỽ lyssewyn. na myrr. na gỽtt.
na bam. na sinam. nac cassia. na neb+
ryỽ ireit gỽerthuaỽr a|e kyffelypei. Ac
veỻy yd oed y gỽyn·vydedic nefaỽluab yn
kyflenwi y pump synnỽyr o serch y radeu
ef e|hun. nyt amgen. o anueidraỽl degỽch
yn kyflenỽi yr olỽc. O arafber barabyl
digrifỽch yn kyflenỽi y klywedigaeth.
O|r perwrychyon melys a|deuynt o wan+
egyat y gỽevusseu. ac o van dagreu y
ỻygeit a syrthynt yn|y caỻonneu yn kyf+
lenwi y safỽrvlas. Ac o|r yspryt anadyl+
wehynyat yn kyflenwi yr arogleu. Ac o
dynerder yr ysprydaỽl gnaỽt. kymeredic
o|r yspryt glan. a|ganedic o veir wyry yn
kyflenwi y pymhet synnỽyr kyffredin y|r
| « p 209 | p 211 » |