LlGC Llsgr. Peniarth 45 – tudalen 200
Brut y Brenhinoedd
200
uab emyr llydaỽ oed urenhin yn llydaỽ y
uenegi idaỽ yr ormes oed ar y bryttanneit
gan genedyl saesson pagannyeit. Nei uab
chwaer y arthur oed hỽnnỽ o emyr llydaỽ y dat.
A phan gigleu hywel y ryuel oed ar y ewy+
thyr. Sef a wnaeth paratoi llyghes. Ac ethol
pymtheng mil o uarchogyon aruaỽc y gyt ac
ef. Ac ar y gwynt kyntaf a gauas yn|y ol
kychwyn parth ac. ynys. prydein. A dyuot nor+
hamtỽn yr tir. A|e aruoll a oruc arthur idaỽ
yn anrydedus mal y dylyit y ỽr kyuurd a
hỽnnỽ. Ac odyna kychwyn a|wnaethant
parth a chaer lỽytcoet am pen y paganyeit o+
ed yn|y chywarsagu. Ar tref honno yssyd
yn lindysei ar pen mynyd y·rỽg dỽy auon
ac a elwir o|enỽ arall lincol. Ac gỽedy eu
dyuot yno. ymlad a|wnaethant ar saesson
ac yn|yr un dyd hỽnnỽ y dygỽydỽys chwe mil
o|r saesson rỽg y llad a|e bodi; Ac ỽrth hynny
y foassant yn gewilydyus. A|e hymlit a oruc
arthur odyno hyt yn llỽyn kelydon. Ac odyna
yd|ymgynullassant wynteu o bob lle y ỽrth+
ỽnebu y arthur. Ac gwedy ymlad o bob parth
yn drut. Aerua ny bu uechan a|wnaethant
o|r brytanneit gan eu hamdiffyn e|hunein.
| « p 199 | p 201 » |