LlB Llsgr. Cotton Cleopatra A XIV – tudalen 33v
Llyfr Cyfnerth
33v
y kyfreitheu hyn. dodi emelltith duỽ ac vn
y gynulleitua honno. Ac vn gymry pen+
baladyr ar y neb a| torho y kyfreitheu hyn
Ar llyuyr hỽnn blegywryt yscolheic ae
hyscriuenỽys. canys ef a oed oreu ar gof
a chyfreitheu yn| y amser. A chyntaf y| gu+
naethant ỽy o gyfreitheu llys can oedynt
penhaf a| chan perthynynt ỽrth y bren ̷+
hin ar urenhines ar petwar sỽydaỽc ar
hugeint ae canhymdaant. E penteulu.
Offeirat teulu. Distein. Ygnat llys. He ̷+
bogyd. Penguastraỽt. Penkynyd. Gỽas
ystauell. Distein brenhines. Effeirat
brenhines. Bard teulu. Gostegỽr. Drys+
saỽr neuad. Dryssaỽr ystauell. Morỽyn
ystauell. Guastraỽt auỽyn. Canhỽyllyd.
Trullyat. Medyd. Sỽydỽr llys. Coc. Med+
yc. Guastraỽt auỽyn brenhines.
Dylyet y sỽydogyon yỽ caffel breth ̷+
yn·wisc y| gan y brenhin. A llieinwisc
y gan y urenhines teir gueith pop blỽ+
| « p 33r | p 34r » |